超之選20201206

返去沙田日賽，因為下星期就係香港國際賽事，今次賽事編排咗六場混地，草地賽道亦選擇咗C+3跑道，以方便養草準備舉行大賽。至於今次賽事水準就只算一般，不過尾場二班1200米賽事就出現高手過招嘅情況。須知道本地泥地賽事僧多粥少，當佢哋愈高分時，佢哋嘅出路就會愈少，但當然有啲亦會選擇放眼海外。事實上，單講尾場就有「超能力」、「好好利高」都係隨時贏到過百分，一旦佢哋贏馬而回，都可以留意下佢哋會唔會挑戰海外泥地大賽。

至於講到今次賽事，我嘅重心馬就係第三場四班1200米嘅「高友之星」。「高友之星」本身為南半球自購馬，在港五戰皆無功。上賽「高友之星」初次四班作賽，當日馬匹同樣出戰泥地1200米賽事，出閘時馬匹即能放出，沿途同「全中」一齊拍放並守二疊位置，入到直路時一直都能保持領先位置，直到最後100米先被對手趕過，最終以兩個又四分一馬位之差跑入第四名。雖然當日「高友之星」未能上名，但再考慮到當日場地形勢並不太利放，而馬匹亦開始有接近走勢，可見呢匹南半球PP已開始適應水土。

今次羅富全安排馬匹出戰同班同程賽事，騎師由梁家俊換上徒弟陳嘉熙，因此今次馬匹只負125磅，比上次少負8磅。睇返對手，今次「高友之星」所面對嘅對手大多都係一啲初出馬，又或者係水準唔高嘅對手，而「高友之星」亦係呢場會採取前領跑法嘅馬，形勢上相信會比較佔優。眾所周知陳嘉熙係其中一位仍未開齋嘅騎師，而佢亦有一段時間冇為師傅贏馬，今次「高友之星」抽到3檔起步，可以搏一搏馬匹可以靠住前速領放，賺取形勢幫騎者開齋。