超之選20201104

今晚係季內首次全泥夜宴，跑返八場，頭場七點三開跑。今期賽事參賽馬雖則好多都係嚟嚟去去都係個啲馬，不過亦有啲馬係初戰泥地賽，都可以趁呢個機會睇下佢哋會唔會一轉場就有驚喜。另外，今晚尾場賽事亦有現時香港數一數二嘅泥地好手「烽煙四喜」同「黃金甲」同場對決，且看佢哋係咪真係會順利一Q返嚟啦！

講到全日重心馬，今次我會要第七場嘅「超霸神駒」。「超霸神駒」本身係智利馬，挾住三項智利一級賽之名來港。來港後馬匹表現都未如理想，於是幕後今次安排馬匹出戰泥地賽事。雖然「超霸神駒」喺外地時都係贏開草地，但從試閘表現，以及係血統而言，都可以顯示「超霸神駒」係一匹潛在嘅泥地好手。

先講試閘方面，「超霸神駒」喺開季後試過兩課泥閘，兩次皆能一放到底，其中一次更加係彈甩「黃金甲」先過終點，從而反映馬匹都幾適應香港嘅泥地賽道；從血統方面，「超霸神駒」父系為美國多項泥地一級賽冠軍Lookin at Lucky，外祖父則為Scat Daddy，上下線皆具泥地血統，因此可以相信馬匹泥地性能頗佳。「超霸神駒」不論喺試閘，以至係出賽時都採取放頭跑法，可以推算「超霸神駒」亦會採取以上跑法。須知道香港泥地好多時都有利前置馬，若果「超霸神駒」成功放頭的話，或有機會一放到底，取得突破。