超之選 20200520

今次谷草賽日繼續跑九場賽事，頭場開跑係6點9。因應再下一次谷草賽事係數到六月三日，今期賽事都幾多參賽馬，結果四班1200米都要分拆做三組，賽事場次都因此變九場。事實上，今晚賽事水準都幾均勢，即使係四班三班定二班都好，今晚賽事都唔容易搵出壓一嘅機會馬，加上未知係咪會唔會跑跑下落雨，投注前都要三思三思。

今次重心馬方面，我就想推介第七場嘅「雪戰神駒」。「雪戰神駒」上次後上差啲得手，表現令人眼前一亮。今次高伯新安排馬匹增程跑谷草一哩亦係合理決定，皆因馬匹陣上都一再展現前速唔快而落腳都唔快嘅問題，1200米賽事或者對於佢而言已經嫌短，再次挑戰跑谷草一哩或會更適合馬匹發揮。再者，Dutch Art雖然服役時都係主力跑短途賽事，但係承襲到佢栗色毛嘅子嗣並唔局限短途賽事，單講香港都有「方程式」、「競駿高飛」、「怡昌之星」等能夠喺一哩或更長嘅賽事更出表現。而「雪戰神駒」亦都是栗毛馬，加上曾經喺谷草一哩上名，今次抽到好檔輕磅作賽，自然亦唔可以睇低佢嘅機會。