• 競馬知舍

【巴基之星】回顧馬壇性格巨星 (長文慎入)

2016 年 7 月 1 日,香港馬季最後一場新馬賽,當時只得三歲嘅「巴基之星」初次出賽,出閘大脫腳,沿路包尾,入到直路落後前領馬接近 10 個馬位,「巴基之星」以 21.22 秒嘅末段締速,一下子將對手一網打盡。





「都知佢好鬥心,都冇諗過咁樣贏架下話~」

「咁犀利嘅~ 新馬都好少見得到咁~ 起步都輸晒啦~」

「大家睇重播都真係睇到頭馬嘅表現真係好誇張下~」


官方評述員嘅即時反應已經說明咗「巴基之星」嘅表現有幾驚人。呢段片長兩分鐘嘅賽事片立即喺網上瘋傳,媒體爭相報道,連平時唔睇馬嘅人都睇埋一份,「巴基之星」一炮而紅,遠至澳洲、英愛、甚至巴基斯坦都有報道佢一出即勝嘅新聞。馬圈以內,本地馬媒有唔少評論指出「巴基之星」前途無限、明日之星、甚至係未來馬王,馬圈以外,則引來唔少網民二創,更帶出「輸在起跑線,贏在終點線」嘅社會討論,掀起一陣熱潮,風頭一時無兩,幕後有見及此,就搵設計師幫「巴基之星」度身設計一款眼罩,襯番綵衣顏色,望落更有特色。



圖片來源:HKJC

期望未兌現 重返地面


經過一個暑假,「巴基之星」喺兩個月後迎接新賽季,戴上新嘅綠色眼罩,繼續夥拍騎師蔡明紹,被捧成 1.7 倍大熱門,再一次以旋風式後勁於復出戰贏馬,熱潮延續,可惜連勝紀錄只係維持咗短短兩場,嚴格嚟講都稱唔上連勝,「巴基之星」升上二班後連吃三場敗仗,蔡明紹受盡千夫所指,坊間批評蔡明紹騎法太斯文,每次都任由「巴基之星」留後,喺對手不斷增強嘅情況下好難繼續用呢種跑法贏馬,最終幕後決定於年尾出戰新馬錦標時,換上冠軍騎師莫雷拉執韁。


其實喺新馬錦標換人呢個決定,觀感上似乎唔太好,因為「巴基之星」喺新馬錦標所面對嘅對手係幾匹三班/四班馬,同之前幾場敗仗相比,對手完全係大幅減弱,喺一場十拿九穩嘅賽事換走蔡明紹,對蔡明紹似乎亦唔太公道,結果亦不出所料,被捧成 1.2 倍超巨型熱門嘅「巴基之星」喺莫雷拉胯下輕鬆贏出新馬錦標,雖然贏馬,但賽後仍然引起馬迷熱議,皆因「巴基之星」於莫雷拉策騎下出現失速、搶口、出錯腳等問題,有人覺得係莫雷拉將馬匹嘅缺點騎出嚟,好讓練馬師團隊調教,亦有人覺得莫雷拉其實比蔡明紹騎得更加論盡、人馬不合拍,雙方各執一詞。





「巴基之星」隨後參加四歲系列賽,由於莫雷拉揀騎「佳龍駒」,「巴基之星」嘅帥權就落入英國冠軍騎師蘇兆輝手中,四歲系列三關賽事,「巴基之星」分別跑第五、第二、第二,連場不敵「佳龍駒」,其後再出戰一級賽愛彼女皇盃,不敵日本代表「新寫實派」再次屈居亞軍,由於以上四場賽事人馬發揮都冇大失誤,以盡所能馬迷對「巴基之星」嘅評價亦開始改變,從捧到天上高嘅評價慢慢重返地面。


惡夢開端 罷跑再成馬壇焦點


2017 年 6 月 25 日,「巴基之星」經歷四場大戰後,出戰三級賽精英碟,同時回配莫雷拉,再次被捧成 1.2 倍巨型熱門,正當大家以為「巴基之星」可以喺對手冇咁強嘅情況下重開勝門之際出閘後,又一幕震撼馬壇嘅畫面:「巴基之星」出閘後跑咗百幾米,突然岳頭、收步,莫雷拉馬上推騎打鞭希望佢繼續跑,但冇嘢阻止到「巴基之星」罷跑嘅念頭,人馬就此停咗喺沙田馬場草地 1400 米起步點附近嘅位置,公眾席上嘩聲四起,同場另外四匹參戰馬已經遠遠拋離「巴基之星」,衝向終點。


「哇搞乜嘢呀隻巴基之星......」

「哇大件事......」

「哇真係咩事都會發生.......」


過終點後,官方評述員嘅反應已經反映出事件有幾罕見及嚴重。


同「巴基之星」一齊停咗喺 1400 米起步點嘅莫雷拉,當刻唔希望馬匹養成罷跑嘅習慣,所以佢決定繼續打鞭催策,希望「巴基之星」重新起跑,花咗一段時間總算令馬匹展步,慢慢跑返終點,人馬衝向終點途中經過公眾席,獲在場馬迷報以大量噓聲,莫雷拉甚至喺下一場沙圈亮相時,都被沙圈嘅馬迷大聲噓爆,場面罕見之餘都十分震撼。





事後當然又引來馬迷熱議,有人再次引用新馬錦標一役,莫雷拉策騎「巴基之星」所出現嘅缺點,指出人馬根本唔合拍,亦有人覺得馬匹跑咗幾場硬仗出現厭戰,亦有信奉非精密科學嘅朋友覺得「巴基之星」有陰陽眼,罷跑係因為見到污糟嘢等等,總之眾說紛紜,「巴基之星」四個字再一次於各大討論區洗版,當初一戰成名嘅馬壇新星,搖身一變成為馬迷口中嘅「衰馬」、「性格巨星」。

禁賽與調教


賽後馬會要求「巴基之星」必需連串試閘合格先可以再次出賽,練馬師告東尼亦循序漸進,先於 9 月出試泥地大閘取得合格,過程十分順利,但可惜 10 月 3 日由莫雷拉出試草地 1600 米大閘時,「巴基之星」再次喺 1400 米附近位置罷跑,一星期後回配蔡明紹於草地跑道上試跑都未能起跑,其後再用儀仗馬牽引、副練馬師巫偉傑在旁用長鞭教馬都係失敗收場,巫偉傑更因為不適當使用長鞭而被馬會罰款。


最後馬主丁志強喺馬會 CEO 應家柏介紹下,請來美國知名嘅馬語大師 Monty Roberts 來港,希望搵出解決方法。所謂馬語,並唔係真係同馬匹講嘢,而係透過馬匹細微嘅身體語言,了解多啲馬匹嘅想法Monty Roberts 正正係呢方面嘅專家,而咁啱當時嘅香港掀起過一陣「動物傳心師」嘅熱話,令人不禁質疑 Monty 嘅馬語技巧,竟兩件事性質相近,時間線亦脗合。無論如何,經過 Monty 調教後,「巴基之星」連續多次試閘合格,終於獲批准出賽,並落實以 2 月舉行嘅香港金盃作復出戰。



圖片來源:Monty Roberts Twitter



賽前告東尼安排「巴基之星」更換配備,除眼罩、改用半掩防沙眼罩,再加上一直有佩戴嘅頭罩,整個配備組合能夠將「巴基之星」嘅視覺同聽覺影響減到最低結果香港金盃一役,「巴基之星」於蔡明紹胯下成功跑完全程,冇罷跑,以第四名過終點,不敵「馬克羅斯」同「明月千里」兩匹馬王級對手,該役香港金盃亦係香港賽馬有記錄以來,首次於兩分鐘之內完成嘅 2000 米賽事。



其後「巴基之星」再次落入莫雷拉手中,跑咗兩場賽事均以第四名完成,但當中主席錦標一役,罷跑問題似乎有復發跡象,「巴基之星」出閘後跑咗二百米左右,開始跟唔上主馬群,莫雷拉馬上推騎催策,仍然遠遠落後,幸好「巴基之星」於轉彎位置開始慢慢跟上大隊,總算跑完全程,但過程令人擔心。

登上巔峰 再次以勝利者身份成為馬壇焦點 「巴基之星」相隔一年再度出戰愛彼女皇盃,由於莫雷拉揀騎當屆打吡冠軍「平海福星」出戰,告東尼就卜定由蘇兆輝再次為「巴基之星」執韁,但「巴基之星」嘅故事劇情永遠都係有過山車情節賽前三日,蘇兆輝因急事未能從英國來港,幕後決定請來澳洲名將麥維凱接手賽前一日,麥維凱於澳洲突然因耳部受感染,即時退出當地賽事同時不宜搭飛機來港「巴基之星」嘅帥權喺混亂中落入客串一日嘅布宜學手上。 結果,「巴基之星」於布宜學胯下,順利出閘,順利經過 1400 米處,沿途緊咬放頭馬,唔需要再留到包尾入直路於兩匹馬中間穿插而上,即場走位評述員賢仔:「最後二百,巴基之星騎咗出嚟先,隻馬騎落去,越騎越勁呀,抛離咗三個身位呀!巴基之星贏出愛彼女皇盃!」





"Pakistan Star, he’s Moody, he’s Mercurial, but today he’s Magnificent" 官方英文走位評述員 Brett Davis 亦即場 call 出一句極高水準嘅評述。


「巴基之星」贏出愛彼女皇盃,首嚐一級賽勝利,罷跑嘅性格巨星終於揚威大賽。一個月後,「巴基之星」乘勝追擊,出戰一級賽渣打冠軍暨遮打盃,由於布宜學並非長期駐港騎師而且本身於英愛係高多芬馬房主帥,無法來港都十分合理所以今次就換上剛同大摩拆夥冇耐嘅貝湯美,結果再次輕勝而回,以兩場一級賽勝利完成自身第三個馬季。






高峰已過 罷跑再現


一眾馬迷期待重回正軌嘅「巴基之星」於新賽季發光發亮,但「巴基之星」喺另人失望嗰方面係永遠都唔會另人失望,新馬季開始,「巴基之星」冇罷跑,但連吃六場敗仗,馬主丁志強決定帶「巴基之星」離開告東尼馬房,轉交蘇保羅訓練佢表明呢個決定絕非對告東尼有任何不滿,亦好感謝告東尼喺馬匹身上花嘅心血,只係基於馬匹表現失望,想轉換新環境,可惜轉入蘇保羅馬房後,「巴基之星」仍然一戰不勝,只能夠喺幾場大賽中跑入四至五名。


2019 年 11 月 17 日,「巴基之星」由薛恩策騎,出戰馬會短途錦標,出閘後,似曾相識嘅畫面出現 ─ 罷跑。相隔接近兩年半,「巴基之星」重現罷跑行為,馬會要求蘇保羅同馬主商討馬匹前景問題,因為馬匹已經有多次罷跑前科,而一個月後,馬主丁志強決定安排「巴基之星」於香港退役,並送到杜拜繼續競賽生涯,交由多屆阿聯酋冠軍練馬師屈達信訓練。


2020 年 12 月 3 日,「巴基之星」於杜拜美丹馬場復出,出戰泥地 2000 米表列賽(白色綵衣),「巴基之星」沿途走三疊望空唔使食泥,跟守第三位,直路看似可以一攻而破但可惜休戰太耐,「巴基之星」無以為繼,以第四名完成,以復出戰兼初跑泥地而言表現算唔錯,可惜其後因腳傷又要休養。





2021 年 12 月 5 日,眨眼又一年,「巴基之星」今次於阿布札比馬場復出,出戰草地 1600 米表列賽,一出閘,又罷跑了,兩日後,阿聯酋賽馬會正式宣布禁止「巴基之星」於其轄下所有馬場出賽,「巴基之星」未來動向一直未有消息。兩星期後,香港多家傳媒報道,原來「巴基之星」馬主丁志強先生已經離世。






正式退役 頤養天年


2022 年 1 月 15 日,杜拜賽馬頻道主持 Laura King 於 Twitter 報道,「巴基之星」正式退役,將會到澳洲 Living Legends 牧場過退休生活,該牧場有大量香港退役名駒,「巴基之星」亦將會成為其中一員,正式為其傳奇般兄競賽生涯劃上句號。


結語


「巴基之星」競賽生涯為香港馬壇帶來無窮無盡嘅話題,同時亦為馬迷上了無數課堂,就連喺馬圈打滾咗半個世紀,騎而優則練嘅告東尼,都話「巴基之星」令佢學識好多嘢。而對於馬迷而言,騎師同馬匹嘅配合,馬匹唔係機器,配備有咩用等等賽馬課題,基本上你都可以喺「巴基之星」身上搵到,學海無涯,或者呢個就係「巴基之星」喺娛樂層面以外,對馬圈最大嘅貢獻。


筆者之所以寫呢篇「巴基之星」回顧,係因為五年前,「巴基之星」首次罷跑,基於想恥臭莫雷拉而喺知舍群組入面衝口而出嘅承諾,五年過去,其實好多關於「巴基之星」嘅微細片段都已經唔記得,當我做完資料搜集,落手開始寫先發現,原來呢匹馬身上真係有好多故事係唔可以刪走,連編劇都唔會編到嘅劇情就發生喺佢身上。作為馬迷其實仲有好多細節想知,點解會罷跑?關唔關莫雷拉事?Monty Roberts 用咗咩方法?點解女皇盃兩次求援失敗都唔畀返蔡明紹騎?等等,我哋冇可能知道晒所有內幕,所以我自己就當係再次細味一次「巴基之星」嘅各個名場面就算,祝退休生活愉快!



鹿

876 次查看0 則留言