這是一場 F 字頭的對決嗎？
英國舉行三冠頭關二千堅尼，美國亦有肯塔基打吡，今年打吡嚟到第 150 屆，對比近兩屆有啲群龍無首嘅局面，今年反而跑出一匹極具星味嘅擂台躉，迎戰日本歷來最強參戰馬，值得期待。
擺下擂台
所講就係佛羅里達打吡大勝 13 個馬位嘅 #17 Fierceness，能夠喺傳統預賽以呢個距離大勝當然唔簡單，但再細心分析佢嗰場嘅段速，可以更清楚知道佢嘅能耐，因為佛羅里達打吡一役，Fierceness 頭八百米造 47.50 只係中等偏慢，但最終可以 1:48.22 衝終點，呢個時間係近 10 年同項錦標第二快，僅次於 2017 年同馬房嘅 Always Dreaming，而 Always Dreaming 最終亦成為當屆肯塔基打吡冠軍，Fierceness 呢種後半段直接扯快總時間嘅表現，絕對不比廄侶差。
咁到底 Fierceness 有冇缺點呢，當地馬評大致都有兩個睇法，就係馬匹表現唔連貫、同埋佛羅里達一役早段受壓太少，不過抽到 16 檔係有助解決呢啲問題，至少外檔起步唔會被困馬林，可以跑自己節奏，失準嘅機率都會因而下降，如果因為一兩場失準賽績而無視本身壓倒性嘅實力，就有啲本末倒置。
至於另一匹 "F字頭" Headliner，當然係來自日本嘅 #11「青春永駐」(Forever Young)，年初喺中東囊括打吡孖寶，而且贏馬過程都可謂錯漏百出，無疑係近年最強一匹外隊馬，跑法上比「冠威」更美式，亦比「取勝秘技」更機動，喜見坂井瑠星喺阿聯酋打吡發揮明顯有進，今次 10 檔都要好好把握。
預賽冠軍
其他馬匹方面，次熱門落喺藍草錦標冠軍 #2 Sierra Leone 身上，藍草錦標冠軍自 1991 年 Strike the Gold 後已經冇再出產過打吡頭馬，但近年都有唔少上名紀錄，而 Sierra Leone 嘅跑法亦幾吻合呢種易位難贏嘅特質，擅長後追一段而直路慣性內閃，抽到 2 檔都幾考鞍上人發揮。
另一匹靠後追嘅熱門馬係 #4 Catching Freedom，出自路易斯安那打吡，呢項預賽有 Mandaloun 喺 2021 年因 DQ 事件而獲升格成為打吡冠軍，亦出產過 Gun Runner、Hot Rod Charlie 等名駒，水準唔錯，今仗有打吡旺門騎師柏列特執韁，同樣有力一爭。
初跑泥地學人爭打吡？
今年有一組打吡預賽深受當地馬迷歡迎，皆因前年打吡爆出驚天巨冷嘅 Rich Strike 同埋上屆打吡亞軍 Two Phil's 都係出自呢組預賽，就係跑 1800 米膠沙地嘅三級賽 Jeff Ruby 錦標，今年係由李寶利策騎嘅 #14 Endlessly 贏出，雖然 Endlessly 贏咗呢場近兩屆指標性唔錯嘅打吡預賽，但原來呢匹馬喺進軍肯塔基之前，係從未正式角逐過泥地賽，練馬師訪問就話 Endlessly 未出道前喺泥地操練嘅表現唔理想，所以一早就將佢嘅服役生涯定位喺草地賽上，當中夾雜過一兩場纖維沙同膠沙地，真正跑泥地嘅實力如何，要到星期六先知。
步速影響
近兩年肯塔基打吡都係一反往年趨勢，要知道由 2014 至 2021 年呢八年期間，都係由前置馬捧盃，但前屆 Rich Strike 以及上屆 Mage 都係由第 16 位或更後位置殺出重圍贏馬，細心一睇先發現，原來近兩屆打吡都係開超快步速，前年頭八百造 45.36、上年頭八百造 45.73，但近 10 年打吡頭八百嘅平均段速只係 46.35，所以連續兩年由後上馬掄元，從步速角度而言，絕對提供咗合理解釋。
至於今年又如何，從各駒上仗跑法推算，#8、#12、#17 都係上仗以領放跑法角逐，以 20 匹參戰馬而言，快放馬唔算多，當然唔排除有馬改變跑法，但縱觀整個打吡預賽系列嘅賽果，今屆入圍實力馬都以後追馬佔多數，要重現近兩年嘅快步速相信機會唔大。
鹿