超之選20210331

今期賽事係季內最後一次全泥夜宴，全晚一共會跑九場賽事，值得一提嘅係今期四班1200米會拆成三組，亦反映今期賽事整體水準都充斥住實力一般嘅馬匹，除咗要留意形勢之外，亦要小心會出現一啲令人意想不到嘅賽果。當然，尾場二班一哩賽事亦一如既往又出現好似「黃金甲」、「烽煙四喜」等一眾泥地好手，當中有啲就坐完馬監可以跑呢場二班賽，有啲就初戰二班或泥地賽事，到底會唔會令人驚喜嘅賽果，亦都係要跑過先知。

全日重心方面，我就揀咗第七場嘅「駿皇星」。「駿皇星」過往試泥閘時一再都能夠交出走勢，上次初戰泥地亦如試閘一樣能夠順利放出，最終最終不敵「再大大」跑入亞軍，但佢亦能夠拋離季軍「淺草飛」兩個半馬位先過終點，都能夠反映馬匹極之適合喺泥地作賽。今次「駿皇星」雖然抽到10檔起步，但睇返今次對手並無一匹領放馬，只要出閘後立心搶放，做啱到第一步，至少就可以確保穩佔先機，而且泥地賽事好多時都偏利前置型馬匹，若果到時大利前置，更有信心可以憑偏差之利一放到底。