超之選20201216

國際賽曲終人散，四項大賽都名花有主，今期又返嚟谷草賽事。相比起上個賽日，今次賽事水準當然地會回歸平淡，整體戲碼都只係一般，部分場次亦明顯地係海軍鬥水兵，各匹機會均等之餘，各自喺唔同方面都有啲可被挑剔嘅地方，因此都要小心意外賽果，亦要動下腦筋去諗諗邊匹馬可以從中突圍而出。

鑑於今期賽事水準不高，今次雖然冇一匹重心馬，但係都想品題下一匹冷門馬，就係第八場嘅「量化歡騰」。「量化歡騰」上季季尾喺四班同程贏馬之後，今季馬匹出戰三次三班賽事都無功而回，不得不令人懷疑馬匹有冇能力角逐三班賽事。但睇返季內三次出賽紀錄，「量化歡騰」前次大外檔起步而全程三疊，上次就稍嫌鞍上人過度捉實馬匹以致出現人馬角力嘅情況。再睇返季內初出一役（即場次053），當日谷草跑C+3欄，面「量化歡騰」同樣抽到大外檔起步，最後馬匹喺形勢不太有利嘅情況下都交出最快末段時間並跑入第五名，表現實屬不錯。今次馬匹換返贏馬拍擋賀銘年而抽到5檔，跑法上可以更主動，形勢應不會太蝕，而且馬匹同時除鼻箍而初戴開縫眼罩，亦可以為馬匹帶來新鮮感，因為「量化歡騰」以往轉換配備嗰場都能交出好表現，可以寄望馬匹憑藉新鮮感跑回贏馬時嘅表現，順利走入一席。