超之選20200517

返到沙田日賽，今次就跑十場，頭場一點開跑，相對上就冇咁chur。事實上，今次有幾場並唔滿額，加上有啲場次雖然齊腳但水準參差，尤其今次都有唔少出賽經驗不多甚至係初出馬，刨馬時都要考慮下佢哋嘅進度同能力。

重心馬方面，今次我就會揀第九場三班1400米嘅「馬友冠」。「馬友冠」近仗整體表現並非極之突出，但係留意返馬匹近五次都係排大外檔起步，近兩次沿途都全程三疊望空，表現未如理想亦都不足為奇。

「馬友冠」貴為南非G1冠軍，但係到依家都未贏到馬，誠然有名大於實之感。但再翻查佢上名時嘅成績，佢對住「聚才」、「駿龍駒」都可以幾乎一齊返嚟，對住「日日精彩」又唔係輸好遠，都反映馬匹質素並非太差，至少呢個績擺起三班都算有一定份量。今次「馬友冠」終於抽到2檔，面對住相對級數冇咁高嘅對手，加上形勢上亦唔洗再面對沿途外疊嘅問題，今次會係在港打開勝利之門嘅黃金機會。