超之選 20201021

又去到週中谷草夜賽場合，今期就冇高班賽事，賽事水準雖然唔算太高，但係有好幾場賽事都頗為均勢，皆因佢哋嘅實力大致見盡嘅同時，馬匹狀態又的確做得幾好，變相刨馬時唔單止要思考各馬匹實力，亦要思考一下陣上形勢如何影響最終賽果。值得一提嘅係，今晚都有幾匹初出馬，而當中有一兩匹血統背景或者來港前戰績都頗有來頭，儘管睇下佢哋又可唔可以俾啲驚喜大家！

今期重心馬方面，我就會揀第二場嘅「爪皇烈焰」。「爪皇烈焰」年輕時曾經喺三班兩勝同程，後來馬匹實力見盡，亦因年老而作戰能力退化，輾轉之下已經有接近四年未贏過馬，馬匹亦都已經落入五班作賽。雖然係咁，「爪皇烈焰」喺呢三季幾喺呢個路程都有過上名記錄，都仍然可以過爛船都有三斤釘。上次「爪皇烈焰」試好閘再出戰同班同程，入到直路時一度係威係勢，仲末段始終都僅能保持同速而跑入第五，表現的而且確並唔算理想，亦引證馬匹不再年輕，但如果考慮到馬匹當日沿途二疊，轉彎時而加兜咗個大彎，實則上當日馬匹蝕位頗多，加上馬匹都年屆九歲，上仗嘅表現實屬不完美但可接受。

事實上，「爪皇烈焰」從年輕時本來就係一匹需要依靠形勢幫助嘅馬，就算係年輕時贏嗰三場頭馬入面，嗰三次馬匹都係抽到中內檔起步，沿途都係守內檔boxseat位再伺機而動，換句話講，如果要「爪皇烈焰」跑得好，其中一個頗關鍵嘅條件係沿途馬匹貼唔貼到欄，慳唔慳到位，而馬匹今次抽1檔起步，最低限度就滿足到呢個條件；另一方面，五班賽事水準不高之餘，好多時對嚟對去都係同一班對手，變相都係好睇形勢做人，而今場大熱門係未曾贏馬嘅「明德之星」，但係如果呢組而言，底質同賽績證明比佢更好嘅比比皆是，所以若果要搏一匹未贏過嘅熱門，倒不如試下預期可以守好位、繼續用贏馬拍檔郭能，而且一再喺呢個路程有過表現嘅「爪皇烈焰」。