超之選 20200412

今期沙田日賽將會跑十一場賽事，皆因今次將會有季內首場新馬賽事，所以開跑時間都會提早到12點半。今次新馬賽就只得六隻，睇返各匹參戰馬都唔算好有作戰水準，所以都可能話係一場BB爬行大賽。近季都有啲高分馬都係由新馬賽出身，又唔知今季呢一套有邊隻可以成材呢？

另外，今次亦都想提供兩匹心水馬：

R5 再享耆成

「再享耆成」今季評分由高位回落，加上上場離奇留後，卒之成功爭取跌穿60分，可以落返四班作賽。今次佢要負133磅且排13檔，不過馬匹本身就用領放跑法，如無意外都係立心搶放。當然，今次同場對手都有幾匹都係會立心搶放，不過睇返佢最近一課大閘，「再享耆成」比之前顯然sharp返唔少 ，前速方面其實唔洗太過擔心，而且「笑傲成功」初次升班，面對更強對手能否放頭亦係未知之數，而「同盟力量」更加抽14檔起步，理論上比「再享耆成」更難埋欄。因此，可以搏「再享耆成」呢匹半冷馬落班賺級數。

R8 水箭龜

「水箭龜」上次出戰谷草同程勝出，成功克服三班賽。今次雖然冇咗莫雷拉，但係就換上另一位贏馬拍檔潘頓。睇返上次表現，「水箭龜」好早透出，末段睇落就嚟俾人過，但最終都力拒對手勝出，可見「水箭龜」本身都有一定韌力。今次「水箭龜」抽到2檔起步，如無意外都係會貼欄跟前，甚至會自己順走。而馬匹晨操狀態都明顯當弗，霍利時馬房呢類上緊而有狀態嘅馬好多時都可以交出好表現，所以可搏「水箭龜」再下一城。