【經典戰線2022】打吡冠軍早已產生？ 從經典一哩賽賽果看打吡賽果

終於嚟到打吡正賽，相信大家都仲對經典一哩賽「加州星球」同「浪漫勇士」拋開曬其他馬咁贏有好深嘅印象，佢哋嘅姿態就似足2012年「甜橙」鬥「陽明飛飛」同埋2014年「步步友」撼「威爾頓」去到今日，無論係海外莊定馬迷都會覺得今屆打吡都係佢哋最好，到底呢兩匹馬係咪咁壓一？除左呢兩隻馬之外，究竟有咩其他暗牌馬可以中途殺出？

圖為「威爾頓」，Photo: HKJC

打吡冠軍早已出現 頭關勝負距離成關鍵？

今年經典一哩賽「加州星球」同「浪漫勇士」分別贏第三名嘅「包裝智威」2.25同1.75個馬位，跑起上嚟就好似唔同班咁。回顧近十屆嘅經典一哩賽嘅同當屆打吡嘅結果，如果經典一哩賽嘅頭二名可以拋開第三名嘅馬1.75個馬位或以上嘅馬，當屆冠軍都係喺佢哋當中產生。2012、2014、2017、2019同2020年嘅打吡冠軍都符合上述嘅勝負距離差距。（註：下圖用藍色Highlight嘅馬就係符合條件而打吡贏嘅馬，黃色Highlight係頭二馬與第三名馬匹距離超過1.75個馬位）

四歲系列賽喺每年1-3月舉行，而四歲賽一向睇馬匹進度先於長力，若然喺頭關就拋離到其他參賽馬，除咗因為馬匹質素較好之外，更重要係反映佢哋嘅進度比其他馬嚟得更快。其他馬匹若然要反先，就必須喺兩個月內催谷狀態並大幅進步先做到。但過往十屆都冇馬可以喺兩個月內提升狀態到突破呢1.75個馬位差距，所以「加州星球」同「浪漫勇士」都足以被捧為呢屆打吡冠軍之選。

當然凡事都有反例嘅，2015年嘅「美麗大師」、2016年嘅「首飾太陽」同2018年嘅「當家精選」雖然都符合條件，但最終三隻都未能跑入打吡前三。值得留意嘅係，三隻馬分別都喺打吡賽前或賽後搵到有異樣。當年莫雅喺出跑道前對「首飾太陽」嘅動作有疑慮；「美麗大師」、「當家精選」都因為煩躁不安而未能進行內窺鏡檢查，其實都反映到健康有機會係影響佢哋表現嘅因素。再拉闊啲個畫面嚟睇，「當家精選」同「首飾太陽」喺打吡後嘅表現都相當差，「當家精選」打吡後餘下服役嘅日子未嘗一勝；而「首飾太陽」跑完打吡後贏一場三級賽之後都冇頭馬進帳，打吡強差人意嘅表現同後續服役生涯嘅成績，反映緊當年或者係因為過度催谷導致用盡咗隻馬。

「美麗大師」喺之後嘅競賽生涯入面主要都係以一哩嘅賽事為主，而且佢喺經典盃一戰已經係全面機會下落敗，明顯唔夠長力，打吡再輸一啲都唔出奇。所以基於呢個勝負距離差距之下，只要「加州星球」同「浪漫勇士」冇出現任何無法估計嘅健康問題，而又唔係完全長力不足嘅話，相信打吡冠軍只會係兩駒其中之一。觀乎兩隻馬經典盃表現，一隻四疊望空都唔斷，另一隻步速唔慢之下一放到底，相信長力唔會係太大問題。

兩屆經典一哩賽冠軍正賽遭空降馬攔路 今屆會否重演？

咁其他馬係咪完全冇得鬥呢？睇返2015、2018年嘅打吡，當年冠軍分別係「戰利品」同「平海福星」。「戰利品」同「平海福星」嘅共通點除咗都係出自蔡約翰馬房之外，佢哋亦都係跳程挑戰打吡兼冇跑過過前兩關嘅空降馬。當年「戰利品」當年頂磅贏二班1600米就增程挑戰打吡，「平海福星」同月贏完二班1400米之後就大幅增程600米跑打吡。要爭打吡入場券除咗透過四歲系列賽事外，另一個方向就係經讓磅賽爭分搏入選，喺四歲系列賽以外嘅賽事提升狀態。過去十年總共有七匹打吡三甲馬係完全冇參與過頭兩關賽事，包括2015、16同20年嘅亞軍「直震撼」、「凱旋生輝」同「夏威夷」，比例算係相當多。

圖為「戰利品」，Photo: HKJC

佢哋唔跑關嘅原因主要分為兩大類，第一就係遲落地而趕唔切跑做好準備跑頭兩關，索性就搵其他中高班長途賽爭分，就好似「直震撼」同「夏威夷」呢啲年頭落地嘅馬，如果因為要爭所謂四歲三冠夾硬催谷跑頭兩關，倒不如專注部署打吡；另一款就係一路贏開，而部署上根本未需要增程嘅馬，例如「戰利品」同「平海福星」咁，只要相信佢哋有足夠長力，就無需要再用長途或者其他嘢嚟做試氣石。

圖為「平海福星」，Photo: HKJC

睇返今年，空降馬有「三江飛輪」、「龍船狀元」同「跨渡口」，前者香港未曾有過表現，後者近期似乎已經到達樽頸，反而最似做到攔路虎嘅會係告東尼訓練嘅「龍船狀元」。佢同2016年打吡第二名「凱旋生輝」比較類似，都係外地級際賽有表現嘅自購馬。「龍船狀元」喺田草中長途賽事三場都跑入前四，更加喺2月尾贏到場三班1800嘅賽事而夠分跑打吡，馬匹適應相當唔錯而且狀態同表現一路提升緊。相較其他兩匹空降馬之下，「龍船狀元」正值升軌，去到正賽最有機會佢將會係繼續進步而有力挑戰兩隻呼聲最高嘅馬。

總括而言，從經典一哩賽嘅勝負距離睇，呢屆打吡冠軍相信都係「加州星球」同「浪漫勇士」之爭，筆者認為「浪漫勇士」將會比「加州星球」更好，「浪漫勇士」上次受制於檔位沿途望空，完全冇遮擋嘅情況下末段仍能造出全場第四快嘅時間跑入一席第四，至於對「加州星球」而言，要喺2000米途程一放到底嘅考驗相當高，歷屆打吡亦未有先例，加上上次潘頓喺賽後亦表示「加州星球」末段僅保持同速。兩駒相較之下，「浪漫勇士」今次排8檔，際遇轉好嘅話就會比「加州星球」更大機會贏得打吡。一眾轉配備嘅馬要短時間內進步咁多個馬位絕對唔易，反而最有機會做到攔路虎嘅將會係持續上升嘅「龍船狀元」，即使未必能夠挑戰打吡冠軍，佢亦都有機會複製「凱旋生輝」嘅成績，以半冷門身份跑入頭三名，希望呢篇專題可以為大家帶嚟更多啟發。

Leo