【皇家雅士谷賽期】沒有英女皇到場的第一天 陰

今年疫情之下既皇家雅士谷賽期，除左少左好多其他國家既馬外，亦都唔會見到英女皇到場觀賽。每年雅士谷賽期都會見到英女皇坐住馬車入場，基本上可以話係呢個賽期既icon。今年既疫情，好多地方都鎖區，好多娛樂都冇左，包括入場觀賽。英女皇都希望以身作則，決定唔會入場睇賽事。今年除左冇英女皇外，仲有每個賽日都有比往多一場賽事，而且亦都將啲一級賽有所調動，例如將一級賽聖詹姆士皇宮錦標調左去最後一日等。先同大家睇下今晚既賽事先，會有兩場一級賽，分別係女皇安妮錦標及皇席錦標。

今年既女皇安妮錦標形勢頗為混亂，與近年既歐洲一哩賽事情況相近，並未有一匹勝望壓一既賽駒。原本上年係英國冠軍賽期中贏得一哩一級賽女皇伊利沙白二世錦標既「變革尊主」（King of Change）係呢場大熱門，但排位前退出。上屆聖詹姆士皇宮錦標既盟主「大競賽場」（Circus Maximus）取代其大熱門位置。呢匹一哩好手自上年去完美國之後就未有上陣，而其一哩成績相當出色。但擔心始終未曾於直路一哩賽事贏馬，今仗出戰直路或會影響表現。

上場於新市場贏出二級賽既「射手星群」（Terebellum）當然都係焦點馬之一，今仗之所以縮程出戰一哩，明顯係想讓路比聽日出戰威爾斯親王錦標既「吵鬧不休」（Barney Roy），但縮程四百米，且對手有所增強，都幾高難度。

寧願搏下「無限大」（Mohaather），上年三歲尾初次出戰一級賽女皇伊利沙白二世錦標得第五，今仗繼跑一哩賽事，經過左一個冬天，相信有所成長。上年四月更造出過一百一十的速勢評分，要搏今仗轉歲有所進步，但兩匹主要對手各有不足，半冷門身份不應錯過。

今晚另一場嘅一級賽係一千米嘅皇席錦標。戲碼不算強，焦點當然係上兩年都輸比「蔚藍海角」（Blue Point）嘅「巴特殊」（Battaash）。上年喺楠索普錦標以紀錄時間贏馬，雖然之後遠征法國大敗而回，但前年去都上唔到名，睇嚟當地唔係好有利。今仗只要保持英國內嘅水準依然難以被擊敗。喺年內冇任何熱身賽下出戰固然有隱憂，然而今年嘅情況好多馬都係first up，而且「巴特殊」first up 紀錄一向唔錯。

上仗於法國擊敗「巴特殊」嘅「玻璃鞋」（Glass Slippers）會喺另一匹焦點馬。上年下半年轉戰法國取得豐碩成果，更贏得一級賽。不過今仗回師英國，其英國成績並不太理想，難言穩陣。

反而三歲馬「隨意海灘」（Liberty Beach）兩歲時已多次於短途賽交出不錯的速勢評分，且是少有復賽後有熱身嘅賽駒。今仗挑戰一級賽固然考驗級數，但三歲馬有讓磅之利，隨時可以闖入一席。

另外值得一提是喺杜拜表現出色嘅「等邊形」（Equilateral）閹後首次回到英國上陣，若單以杜拜之表現，絕對可以上名，只係擔心佢會唔會未必應付上落斜嘅賽道，始終雅士谷馬場成績不算理想，咁當然一場係鑽禧錦標，而另一場係皇席錦標，輸係好合理，但都輸得遠。睇下閹完係咪可以破埋呢個數據。如果你想買三、四重彩就冇得唔要嘅，不過我就唔搞咁多嘢喇，應該都係「巴特殊」同「隨意海灘」單Q。

今晚會有知舍直擊，而黎緊五日將會有唔同手足同大家預測各個賽日既賽事。