【皇家雅士谷賽期】 Day 3 Allin弦樂器 全民有責

嚟到雅士谷賽期嘅第3日賽事，重頭戲係一級賽雅士谷金盃。雖然得8匹馬上陣，但預料比賽會相當精彩。首先係擺下擂台陣嘅「弦樂器」(Stradivarius)，上年幾乎喺大長途賽事中全勝，可惜喺冠軍長途盃中輸比「植物園」(Kew Gardens)功虧一簣。最大對手「植物園」唔跑今場，「弦樂器」要面對嘅對手都幾弱。上場「弦樂器」出戰加冕盃只得一席無威脅嘅季軍，但已收熱身之效，面對實力弱一截嘅對手今次三奪金盃機會極大。

次選就會喺4歲馬入面揀，最後都係揀「豐裕路」(Nayef Road)。呢匹上年聖烈治季軍上場贏出金盃之前嘅熱身賽薩嘉羅錦標，表現相當出色；而且面對今場2匹同齡嘅「月光酒」(Moonlight Spirit)及「巧工妙藝」(Technician)都係輸過一次咁大把，以同齡計級數應該稍高。

三選揀返「巧工妙藝」，3歲贏出一級賽皇家橡樹錦標實不簡單，但抖咗8個月會有少少擔心，因為冇熱身直接贏到雅士谷金盃嘅馬其實少之又少，對上一隻做到嘅係5歲嘅「詩人作家」(Yeats)。唯一利好消息，相信就係臨場落雨會對佢表現有幫助。至於剩低嘅4歲馬「月光酒」，上年女皇瓶後過「豐裕路」過終點，雖然之後有贏三級賽，但係比起「豐裕路」同「巧工妙藝」就輸級數，同埋久休復出都係一個大問題。

其他可以留意「湄公河」(Mekong)，2月份出戰浪琴草地讓賽得亞軍不敵「借東風」(Call The Wind)而壓到今場在陣嘅「亞朗親王」(Prince Of Arran)及「還擊」(Cross Counter)；去完沙特阿拉伯嘅馬唔少之後都交出表現，「借東風」返到法國都贏到三級賽，咁預期「湄公河」上到20化郎交出好表現，都合情合理。「還擊」上年跑呢場入直路係跑得非常吃力，完全埋唔到「弦樂器」身，信佢唔過。

「亞朗親王」除咗喺香港瓶唔見人之外都交出穩定表現，但係級數輸蝕咗，四五名都可以預下佢。「兵來將擋」(Withhold)連跑級際賽都唔穩陣嘅時候，今場仲要面對強咁多嘅對手難有驚喜。