• 競馬知舍

【狼大師論馬】承你所願勢要再下一城

第5場四班1400田草

我覺得今場係幾弱組馬,再望過賠率(約星期六下午),竟然被動難贏嘅「都市神話」係大熱!?我決定以一個價值投注者角度寫呢場馬,睇下邊隻抵買。

其實以呢場賽事咁多隻馬嚟講,只有「承你所願」跑過三班,仲可以近;而其他馬都未上過三班,喺四班又未見驚人嘅威力,搶眼嘅表現,飛躍嘅進步。只要「承你所願」無健康問題,理應十分值博!

「承你所願」喺上仗(第91場)跟前守好位,頭3段都係跑緊58.31嘅快時間,比當日後場三班仲要快咗成秒,而末段都交到22.81嘅成績,其實相當恐怖。結果佢同賺晒形勢嘅「金碧科」齊齊走甩咗後面3個馬位以上,表現搶眼!照呢個時間,佢喺四班走甩,應該唔成問題。

喺條件上,「承你所願」有見習生減10磅,仲要揸1檔,比較有利。我覺得呢場無咩快馬會段段快去燒佢;就算燒嘅話,都可以好似「發財寶」一樣咁捉,可以守好位,比較機動。坦白講,我就唔認同馬會嘅速勢圖;雖然形勢嘅野好難講,但係我唔覺得「笑傲成功」「三圓䮭路」真係快過「承你所願」。

最近晨操,韋達都自己親操。「承你所願」仲係咁fit,腳法仍然好爽!


同場對手

真跑得:有目的減分,谷草1650先再諗。form都無,暫時唔考慮 都市神話:最近就食慾不振。都幾惡,但次次唔好彩,追第2嘅多。佢係幾慢腳,一定跟唔上快步速,要縮到好後,就算慢步速最勁都只係第7位。跑咗咁多場同班同程,要嬴就一早贏咗。另外,佢咁細隻,最近發現血液有問題,又無咩胃口,的確令人擔心! 笑傲成功:氣量不足,未必跟得到 又夠醒:貫注力唔太夠,只能夠話進步咗少少 正本開心:有啲懷疑第一場谷得太勁,之後身體有事,好似一步都無,晨操普通 精進百樂:熱門之一。怕大步馬揸咁嘅檔,步速估計都唔會太快,又加咗啲分。晨操幾好火,只怕用晒落個口度。上仗嬴嘅時間係1:10秒開外,嬴得唔叫輕鬆,都要推住嚟嬴。今場佢增程1400,夠唔夠氣已經係一大問題,仲有大家好多時都主觀願望呢啲馬會進步,但真係進步到不停嬴上去又有幾多隻?我覺得呢隻馬無想像中咁強勢! 創紀錄:冷腳要防。上仗追勢強勁,賽後發現有痰,可能清完痰會更好 中神通:腳法越嚟越好,但實戰2場同程都無咩特別 陽明秋秋:明顯四班近,五班超 得益良多:上仗明顯跑錯晒,可以劃咗佢。始終無潘頓呢啲識留力嘅師傅騎,可能差好遠 天意:成日都fit,但力短、外檔難出頭 爆騷:試閘普通,慢慢觀察 三圓䮭路:試閘步速慢到暈先有得沖下。無咩特別


狼大師 2/11/2019


(Photo: HKJC)