• 競馬知舍

【狼大師論馬】餘皇重帶眼罩 望交出處女作

第1場五班1200泥地


「餘皇」同星期二介紹嘅「隨我來」都係喺告達理馬房轉文家良馬房,減足一季分跌落五班,再轉強勢馬房而嚟!


雖然「餘皇」只係跑過一場泥地,但係佢應該識跑泥地。佢喺外國跑過膠泥地1000賽事,兩場計得1冠1亞。好多喺外國Polytrack賽事拎到好表現嘅馬,喺香港泥地賽都交出好成績,例如第4場高班少少嘅「都靈紅星」,都贏過三場膠泥地賽。另外,「餘皇」出賽咁耐,只係跑過唯一一場同程賽事。喺17/18馬季,佢曾經喺三班跑過泥地1200,而時間係1:08:80,基本上係今場同組最快!嗰時佢仲係後生,仲要喺三班縮後跑都追平,實力唔差。


「餘皇」嘅高機動性,係今場嘅關鍵。睇返喺告達理馬房第一季嘅賽績,佢係可以由外檔切入擺前走,一邊推一邊移位,機動性幾高。再睇返18年7月11日賽事(790場),就算佢無眼罩,都可以喺負131磅之下同赤水神駒鬥放,而且輸得唔遠。佢今次揸7檔,如果可以一出閘移去擺前,就大大提升取勝機會率。


「餘皇」今場練足氣而嚟。韋達嘅部署都好明顯,首先安排「餘皇」跑場谷草1000練氣;可惜外檔,加上佢無1000嘅前速,都係縮後跑,前面馬又唔斷,所以末段只係追少少,當減分。之後一場四班1200田草,雖然揸好檔,但係對手級數都比較高,佢賺晒都只可以嬴到「馬功臣」少少,後者其後都有交出好表現。上場跑1400再練氣,3疊之下,又明顯唔夠1400氣而大敗而回,其實可以當佢無跑過。經過呢三場,相信佢已經練好晒氣。


「餘皇」直到5歲上季都未騎過,而嚟到韋達馬房明顯FIT咗好多。近期快跳、踱步,佢都呈現蝦公頸;佢明顯無咩用過,又踏入5歲之齡,應該到達黃金期。佢報今場,重帶眼罩,明顯會博。


我估計韋達嘅指示會同姚本暉「隨我來」一樣,指示沈拿要「餘皇」盡量擺前,可以嘅話就放頭。今場明顯得「勁快步」係放頭馬,如果沈拿力策,有望平排領放,甚至快過「勁快步」,直接走甩!



同場對手

眾善積福:1檔應該有助改善佢轉彎唔順嘅問題,但貫注力未到正常水平

洪荒駿駒:好fit,但評分明顯盡。如果落雨會有利

幸運飛駒:試閘咁樣走,根本定義唔到!明顯減分落五班博,級數又高,隨時放頭贏;只係怕佢壞咗無晒鬥心

蜜運:最多拖冷腳。晨操都唔差,可能有得追下,但被動力短

勁快步:上仗不良於行,可以話有藉口解釋。晨操差唔多,作戰狀態仲喺度,主動又識嬴

樂無極:觀望。晨操腳法又柔又勁,但實戰擺前又係近,追又係近。呢次明顯略有進步

越跑越好:力短,級數惡,但明顯老退好多,只可以跑嬴一啲唔識跑嘅馬。夠忠心,例追一段

為您嬴:分盡,感覺似試閘,加返眼罩應該會好少少

樂多福:觀望,最多拖。好超好惡,但係唔敢試閘,健康有問題,狀況每況愈下。成200日無跑,晨操還可

不忘初心:唔太明,不停轉配備,又試1800,又縮落1200泥

神火金剛:力短,外檔,當試閘



狼大師 26/10/2019


(Photo: HKJC)