• 競馬知舍

【狼大師論馬】隨我來初繫舌帶 級數極高

第2場五班1000谷草


早喺2年前,「隨我來」仲喺告達理馬房嗰陣,喺三班跑都可以追近。佢嘅主要問題係力短,同時出閘後搵位唔夠小心。


雖然喺最近試閘「隨我來」要推騎,但面對前面一堆三班以上嘅強馬(「新力寶」「寶山鷹」「日日精彩」「酷比哥」),跟到已經算係唔錯!佢近排體重不跌反升,應該心情幾好,尤其對本身較輕嘅佢嚟講幾重要。


我覺得姚本輝應該CHECK到「隨我來」有呼吸問題,或者有特別部署先會綁繫舌帶,所以諗落都正面。全場得佢一隻馬無傷病,應該比較好。仲有就係,上季文家良都無咩點用過!


今場對手唔係特別強,基本上五班馬都係力短難嬴、只有單一跑法嬴,或者根本未入局;所以相較下「隨我來」嘅級數係極高,實力應該係數一數二!


季初1000谷草,「隨我來」已經同今場對手「雷超」「洪荒駿駒」碰頭。後兩者分別揸1檔同9檔,都騎啱晒;「隨我來」揸8檔,又守得太後,最後爆一段都係輸佢哋唔夠1個馬位。相信今次佢揸黃金1檔,出閘拎位自然係最着數,形勢上有機會反先!



同場對手

金剛秀、大地和平:明顯老退

勁好玩、皇家魅力:明顯力較短,希望轉配備有幫助。「勁好玩」重帶頭罩應該更好

喜奔騰、大灣駒:明顯未入局

吉利馬王、做得好、幸運大兄:都係好尺寸,要形勢好就先會嬴,但佢哋狀態都係近乎初起



狼大師 22/10/2019


(Photo: HKJC)