• 競馬知舍

新加坡金盃賽馬日:國王路易強勢登基

S2-1 (R6) 1 俄國製造 3 賽菲爾 10 提大人 12 林家爵士

S2-2 (R7) 1 民間智慧 6 太陽唯一 3 家寶恩 2 尊駕

S2-3 (R8) 4 偉大肯尼 3 美瞳 11 新鮮事 9 精彩華麗

S2-4 (R9) 4 威力勝 6 旺狐星 10 林家驕傲 13 千禧霸主 7 神行太保

S2-5 (R10) 12 國王路易 13 飛天火箭 1 縱橫大地 2 聖劍 11 克林

S2-6 (R11) 4 暹羅萬代 7 林家飛揚 2 尼佩恩 9 奇門遁甲 1 精英威力


今次星期日轉播六場新加坡賽事,重頭戲屬三冠尾關新加坡金盃,其餘場次可分兩類,一類有明確嘅膽而腳多,好似R6同尾三場;其餘兩場就直頭亂局,臨場見飛行事。由於要分析所有賽事,故事不宜遲,馬上開始。



【德星新加坡金盃 R10 飛天火箭深慶得人】


先講一級賽新加坡金盃,膽大家都知係「國王路易」,腳就好闊,尤其排位後更混亂,最後買Q「國王路易」膽拖1,2,11,13,有後起有老牌,T及四連環更闊,3,4,10,15都可選擇。


12 「國王路易」小弟愛駒,上年同日初出半爆氣走「青年才俊」;其後逐漸增程發揮威力,連場蝕步速蝕腳程都狂衝,包括新加坡堅尼後追不及輸比「克林」;其後復出先run兩場,之後跑二千黃金鄉全程外遊,轉彎入直路七疊,結果憑鬥心補中反勝「飛天火箭」;上場跑千八,今次縮埋欄,直路一穿而破,再次氣走飛天火箭,確認搵啱配搭;今次重上二千,全程有長力、有銳氣就得佢一隻,適逢馬王「窮追不捨」退出,少隻勁敵,薄奇能做磅騎13檔 (如無馬補上變10檔) 都係縮,入直路憑凌厲後勁可捧G1。


13 「飛天火箭」五檔、韋紀力,條件都正面。此駒由千二起家,開始增程,但問題就係有時好易上口甚至搶口,配韋紀力理應可處理好;前次初跑二千跟前效果麻麻,上場再跑二班千八,今次因搶口慢咗反而因禍得福試後追,直路狂衝僅敗,確認留後對此駒佳。今次五檔希望唔好跟前,因為呢場都肯定多馬想走,縮後直路鬥衝,絕對可以入位。


1 「縱橫大地」正正排位後搞到我頭痛,如果排10檔我安心劃,問題就係排一檔,明知二千只係5050,但食級數而有得慳住跑,強配馬雅,真係有權二至五名。無疑上場上千八已見末段均速,勝在憑香港嘅級數食得住大部分馬,馬雅騎熟發揮安心,三甲難輕視。


2 「聖劍」又係另一隻愛恨難分嘅馬,熟知小弟嘅都知此駒亦屬愛駒,問題今季真係好失望,尤其克蘭芝一哩,輸唔緊要,竟然直路毫無反應;說服我搏變身只因三原因:上幾場副車身份冇砌盡跟中游、回配最佳拍檔、二檔增程,預期會冷咪兜一兜,埋門單跳真係無問題,如今場都冇就放手。


11 「克林」菲特文部署真係神級咁搞笑,五月新加坡堅尼強配潘頓走先擊退「國王路易」,跟住卻不循規蹈矩,走去越級蝕磅蝕經驗對年長馬,連場近而難贏,相反「國王路易」乖乖地跑二班即繼續表現,不過細心睇此駒幾場G1都難度高,三冠首關萊佛士盃遇上「快意恩仇」頭三段放痴線步速1分09秒89,跟到氣嘔而冇斷;上場同樣跟偏快步速,末段冇斷我滿意;睇血統二千應該到,配福特騎師曾騎「兼併目標」贏此場,憑輕磅如肯稍留可變身,埋門拍跳大把在手。


3 「氣勢磅礴」神經刀老馬上場賺步速近,此程唔懷疑,要擔心係年長後開始配飄忽而要讓此群,T腳。4 「果亞來賓」上程又係5050,食級數近。10 「達利多」檔好銳開衝到此評分,負磅就唔算太利,配搭亦未算十足信心。15 「林家魔術」上程配田泰安必熱,又係要估,過熱欠價值。


5 「鐵血戰士」人馬合拍而質次一班。6 「巴哈納」久沉17檔唔信。7 「精英無敵」打比谷得好勁,19檔好難跑,上場雖說輕騎但真係欠大反應,埋門落草地竟然要推但都過唔到老馬「威威路」,失望。8 「邁克雷格」檔劣而二千稍長,怕上口早段會用得多咗。9 「藍瑞典」老馬難預。14 「特肯漢」此群陪跑。16 「秘密勝利」今季失望。

「國王路易」上仗力壓「飛天火箭」。 (Photo: Singapore Turf Club)


【R6 俄國製造展開升浪】


回到第六場三班千二第一組,好彩三班千二拆兩組,否則明星馬「俄國製造」、「暹羅萬代」、「精英威力」撼埋一齊都唔知點取捨,呢組水準比尾場係稍弱,先劃走7,8,11,14,自己就先秤高1,3,10,12,T及四連環加入2,13,應該包得晒。


1 「俄國製造」又一隻CHC明星馬,八月底初出跑膠沙千二,直路輕易飄忽對手,當然水準唔係特別高,勝在姿態輕描淡寫而質新。此駒今次膠沙轉草,新加坡好多質新馬膠沙一轉草會死,查一查此駒外地贏草地,咁就無問題,體力充足揀大賽日復出,只比贏馬加一磅,影子主帥紀斯續騎有保證。


3 「賽菲爾」上場同提大人一齊跑,正正輸比尾場明星馬「暹羅萬代」,不過各有藉口。此駒前仗跑克蘭芝C級賽贏馬,當時直路一度被封,「太陽光譜」率先走甩,但此駒三兩個箭步拍住趕過;上場配馬雅成熱門,騎師卻捉到隻馬搶口,直路其實無斷保持,只係輸比隻痴線馬「暹羅萬代」;今次顧偉樂騎較安心,跑法主動磅位恰當,退熱不妨兜返。


10 「提大人」於同場則遇意外,直路塞車成幅城牆擋住無法催策,末段湧近相當唔錯,但揸住前場輸比「楊先生」一馬位、壓倒「熔融大使」嘅績已不必擔心級數,今次配尚恩愛將潘明輝,比上場輕4磅幾,對手唔算強亦可一爭。


12 「林家爵士」同13 「神通魔法」我糾結好耐,最後信馬房信馬主,揀「林家爵士」,三班底跑千二千四長近,欠壓一但等到機會就可殺,季中才於此評分贏馬、上千四得殿,輾轉減夠分上場即輕易湧近,配搭不變亦可繼續近。


13 「神通魔法」則屬後起,近五場3W2Q,不過就由四班贏起,贏嘅馬亦唔特別今今次確實面臨考驗,馬房功力平平,當然可以贏晒,但對手大幅增強太熱不值,你話QT拖住就不反對。


2 「太陽美夢」受傷患困擾,埋門閘欠特別,15檔幾惡搞,久休睇場先。4 「帕托」即易名前嘅「龍神」,有點早熟早殘味道,計班底當然高晒,不過要搏能否跑出水準。5 「無敵」膠沙較佳,跑草配田必熱,檔好或近但難贏。6 「土豪」季中用盡升浪,呢個分草地千二有點勉強。7 「明道」繼續減分。8 「電子樂」評分仍高。9 「渥太華」唔叻,頂多第三。11 「無敵力宏」初出千二嫌短。14 「林家偉大」初出熱身。



【R7 民間智慧形勢好跑】


來到全日最混亂嘅B級二千,亂就亂咗高分馬各有缺點而普遍唔銳,亦欠壓一,低分馬則賽事水準唔強,最後唯有勉強揀「民間智慧」膽,兜埋2,3,6,T及四連環考慮埋8,9近績較好。


1 「民間智慧」貴為法國打比季軍,淪落至新加坡仲要跑三班都苦戰實在難以交代,難得今場對手真係好弱,理應要再執多場。贏馬個場膠沙千六冇乜好講,反而想針對講下兩場二千,先講輸比「明星傑克」個場,留到尾直路嚴重塞車,無法催策,最後揀內欄終點前一鞭未打撲入第五;前場跑黃金鄉,希威森可能唔熟隻馬,搞到隻馬直路邊衝邊側頭唔算太順,但最後仍壓倒「美瞳」入P,水準唔錯。今次落班對此群對手減弱,回配羅達一檔預計不需太被動,埋門走過非常輕鬆,直路可一攻而破。


6 「太陽唯一」質新,「信可成真」子嗣早早認定要上程,果然千四近完千八即輕勝,當然水準非高;上場正正升班對家寶恩,對方走順才衝刺入Q,表現其實唔差,長途未盡而對手真係唔強,憑銳氣已有權提升名次。


3 「家寶恩」菲特文三雄中檔最好,馬就仍然有缺點,雖說上場一上程已交代,但其實情緒仍不穩流大汗,今次勝在檔好預計會繼續自己掌握節奏,二千更好紀斯策騎,於此群計已算庸中佼佼。


2 「尊駕」12檔如殺埋嚟放頭或可捱近,同樣食級數,論態當然非季初殺走「特索羅」時咁銳,不過前場黃金鄉末段肯衝入第六,分就算合適,對手亦真係唔強,埋門拍跳過「潤利多」姿態係無問題。


8 「林家波紋」則於四班贏副班賽事,水準未算高,不過二千五戰僅一場冇前四,檔好或可以下犯上。9 「默里納」強配增程,勝在未見底,都係邊線之選。


4 「潤利多」馬拉一級賽冠軍水準低劣,增程則合,上場賺盡都斷,頂盡近。5 「玉龍勳章」水準欠奉。7 「玉龍榮耀」內在似有毛病。10 「英式比利」老馬已收夠籌。11 「音樂祭典」只睇馬房胃口。12 「女皇陛下」未算特別。13 「大亨」升班收檔。

曾以法國打吡季軍身份來港參戰女皇盃的「民間智慧」,現於新加坡服役。 (Photo: HKJC)


【香港賽馬會錦標 R8 偉大肯尼準得可愛】


來到克蘭芝B級賽,當90-70分範圍咁睇,由於一批好馬去晒跑巴克錦標,形成呢場屬金盃遺材賽,充斥唔銳嘅馬,後起又需要更多證明,形勢都係亂,個人範圍就3,4,9,11,T腳才兜返2,6。


4 「偉大肯尼」未必贏,但揸QT膽感覺就來得安心,狀態來嘅時候往往維持到表現,近五場非亞即季,夠晒忠心;前場跑同班同程入Q僅敗,當時係蝕盡步速,全場得佢一隻可以咁後追上,輸比當銳「邁克雷格」無話可說,但已拋甩群駒;上場上二班跑千八,正正對住「國王路易」和「飛天火箭」,實在已盡所能保P壓倒「美瞳」,擺落此組夠硬淨。今次對手弱,千六佢強項,一檔好好跑,埋門拍跳話過就過,可配合馬房全日大軍壓境,坐位望贏。


3 「美瞳」次選,金盃後備二多數無得跑,此駒質新且難得高岡肯盡用,當然千六會稍短,但今次對手唔強,預計又無馬帶,隨時九檔殺埋欄控制步速,普拉瑟夾高岡當屬黃金組合,搏佢賺形勢近。


11 「新鮮事」則屬後起之秀,後勁強橫馬非常忠心,歷來只於堅尼甩前四;復出後最近兩場都贏,無疑對手唔強,但虛分馬今次跑高半班而對手大多欠銳,羅達騎只會更安心,11檔相信都係縮,三甲甚穩。


9 「精彩華麗」最佳冷門,呢隻馬係睇唔透,高岡成日同你兜鬥耐性,跑啱步韻突然就殺晒,分就已經燉到合理水平,雷馬克都屬馬房冷殺手,冷勿盡忘。


2 「威威路」近幾場失望,忠心鐵馬季初季中個段搏得好勁,尤其力拼獲勝原因個場耗力甚多,加上去到9字頭漸現瓶頸也可理解,不過馬性忠心就例撲下,上場全程望空可抹去,無疑現時非銳上千六,但有磅減可助佢衝入一位,最後試跑落草地就頂得住」精英無敵」,冷門亦屬佳選。


6 「賀小弟」千四肯定最強,10檔千六放頭未必捱到尾,強配限於三三四四。1 「奔向終點」現時年紀千四好過千六。5 「皓月千里」神經刀從來都唔識評,鍾意咪買下,又係等場爆嘅馬。7 「帝王夢」千六欠優勢。8 「主席」唔銳。10 「默里菲」上場驚喜,升班行人止步。



【R9 威力勝形勢理想】


呢場四班仲要係副班嘅賽事乃轉播六場中班次最低,但張力十足,質新馬亦多,重心當然係5,6一對,但邊線馬亦多,真正敢劃死只得3,12,自己會傾向從2,7,10,11,13度揀,我就兜埋「林家驕傲」同埋「千禧霸主」。


4 「威力勝」應該都係此賽大熱,無疑未開齋,但連場已展示潛質,跑千四入Q輸比「林家慰問」,但壓倒再出有Q嘅「太陽大將」,「林家慰問」再出升班同「新鮮事」鬥到最後一刻,證明水準唔差,之後輾轉保持水準但千四嫌短;上場上千六,部署正確,因應外檔選擇留,直路封住實力指標「世紀之鑽」,無疑已被「聖騎士」拋甩,但此駒唔算有強橫爆發力,我對追勢已感滿意;埋門拍跳志在輕抒步頭,姿態輕鬆,今次四檔希望跟前,有權開齋。


6 「旺狐星」好早已贏千六,其後休息復出跑兩場短嘅熱身,上場重返千六即憑凌厲後勁入Q,壓倒「寧靜王子」,後駒升班可以力拼僅敗但拋甩「東山再起」,呢席第二水準不弱;埋門試閘看似失望,直路有推都唔撲,但當時係為針對內閃側頭嘗試加面箍,隻馬就可能覺得唔鍾意就揈,所以今場都冇加到,薄奇能唔騎換顧偉樂都合適,檔好跑不容忽視。


10 「林家驕傲」上場於未奪標賽贏馬,當時直路遲望空一移即大步撲上,終點前睇住過十全大補,姿態理想。晨操見此駒繼續進步,氣定神閒,跑副班難度不大亦有好檔,機會分子。


13 「千禧霸主」就真係純買田泰安概念,馬就真係咁上下,但呢幾場仍然場場肯撲,跑千六屬贏馬路程,六檔輕磅田泰安同馬主合作愉快,有權省得起,贏唔預但提升名次入QP就唔奇。


7 「神行太保」晨操弗到震,「信可成真」子嗣上場大幅增程直路頭一度係威係勢,既然唔到咪縮程,問題就係個15檔,真係唔知佢點跑,如果放內側「宏圖大志」我樂意新感覺多數頂佢,形勢難計二至五名,馬就肯定此班難留。


2 「匹茲堡」縮程係疑點,級數夠或爭下P。11 「灰小孩」上場贏未奪標賽,水準平平,今次限近。


1 「新感覺」檔好又引人,上場賽後報告呼吸有問題,晨操外觀就冇問題,睇你敢唔敢搏佢冇事,不過磅唔算有利。3 「玉龍聖龍」跑下先。5 「我樂意」上千六,佢幾次跑得好都要賺超慢步速,近而難贏。8 「比波普」配搭好而呢個磅位唔算有利。9 「凱特使者」老人家應收夠籌。12 「惡速」升班收檔。14 「宏圖大志」千六稍短。



【R11 暹羅萬代難尋敵手】


來到尾場又係話題之戰,幾大明星馬對決,邊線分子又唔少,絕對係可觀嘅賽事。馬膽當然屬上次勁到痴線嘅「暹羅萬代」,腳範圍多,個人會從1,2,7,9,12揀,睇你地點選擇。


4 「暹羅萬代」三捷不敗,初出狂勝完全係跑自己,再出膠沙選擇跟人入直路,輕易過咗投石問路,薄奇能可能以為必勝,冷不防「大革命」狂奔,差啲就影輸;再出升班跑草地千二,當時我冇揀,因為新加坡太多質新馬膠沙掂一轉草地即無影嘅例子,結果卻交出震驚世人嘅表現。首先改變跑法留到最尾,遇上一場連四班都快過佢嘅頭兩段47秒1,入直路遇上超級劣勢,前面重重為困,「暹羅萬代」內欄左穿右插搵位,嘗試衝刺時又比「中國製造」撞埋欄,新馬竟帶超凡鬥心,難以力騎下爆段22秒12,終點前睇住「此情無計」過,姿態驚人,末段之快比花園城市錦標嘅「楊先生」仲快,實在誇張。復課例牌扮晒野,拍跳後面唔過對手,完全冇鋒芒,今次十檔應該避免塞車,支持薄奇能食口三寶慶祝。

「暹羅萬代」至今三戰全勝。 (Photo: mjcrs.com)

7 「林家飛揚」最佳冷門,多明星馬跑佢會稍受忽視,但千祈唔好睇低,無疑上場係落四班副班贏膠沙一千,但根本膠沙一千係路短,贏到係明食級數;回升三班而季內跑此班千四係長期得三至五名,包括此程只係影輸比明星馬特索羅,磅位利此班佢唔太蝕底,檔好而減磅可望跟近。


2 「尼佩恩」原來從未跑過千二,反而於千四千六贏,上場係打比千八大敗完全唔需要理會,休息期足夠從頭做起,久休揀千二復出會有新鮮感,埋門拍跳頂得住「提大人」,揸住贏「新鮮事」嘅千四績憑新鮮感可殺入圍。


9 「奇門遁甲」則屬我頭先講嘅擔心類型,膠沙全勝,升班轉場,會唔會好似「暹羅萬代」贏到冇得跑,又係要估,當然馬主今季大旺,「無人機」、「大革命」、「四分衛」等連場得手,連帶「小大人」都咸魚翻生,但強配而欠賠率就好難說服要搏佢轉草一定得。


1 「精英威力」膠沙專家,連同外地都係膠沙最好,草地可應付而唔突出,不過馬性太忠心,排埋一檔騎練合作好,唔預贏但位置唔敢飛。12 「故事多」外地曾勝草地,如臨場有雨不妨提升評級,三至五名。


3 「傑米隊長」閘狂勝引人注目,不過對手大多係新馬佢贏係應份,始終覺得千四千六最好,縮程13檔要考驗。5 「真棒」減分。6 「威武太陽」低迷,12檔難蝕。8 「星際帝國」上場極失望,縮落千二太短。10 「勝者為王」對此群應行人止步。11 「搖滾時刻」狀態好而能力未證明太多。13 「急先鋒」等落班。



By Tipsmaster

447 次瀏覽