• 競馬知舍

【賽馬全方位】沙田日馬冷熱拼盤

20/10/2019 (日)沙田日馬冷熱拼盤 大家好!我係Facebook專頁賽馬全方位版主, 上次提供嘅重心半冷「駿協精英」終於贏左,希望大家有份中,今次沙田賽事會就幾場賽事提供心水,當中會提供四匹冷門同四匹熱門,希望繼續幫大家贏錢。

冷門心水 第一場五班1400米 — 至尊大師 落班夠殺 首場賽事形勢比較均勢,好多馬喺五班都有一定能力,的確好難揀,今場預料步速偏快,有排左14檔嘅「至尊大師」領放,呢隻馬亦都係我今場嘅首選,因為佢五班相當有級數,上季喺五班千四兩戰全勝,四班就完全唔夠跑,今次難得落嚟五班,一定會搏到盡,排14檔唔係問題,因為佢而家冇咁fit,起步未必咁爽,排內檔萬一起步慢咗,比外面啲馬擒過就放唔到,所以今次只要起步搶得到放頭,就可以叫糊。

第四場三班1000米 — 加州神箭 落班冷箭 呢場形勢又係相當均勢,最矚目嗰三匹相信係兩戰全勝嘅新星「經典之星」、試閘矚目嘅初出馬「好好學習」、同埋新勝猶勇嘅「高耀智星」,不過我覺得子彈快馬「好好學習」晨操有啲急,冇錯佢係有唔錯嘅速度,我驚佢同經典之星一齊放得太快,最終攬炒,所以我又係搏下啲落班馬,1號「加州神箭」,呢隻馬最深刻係上季尾跑場沙田二班千二米,直路衝刺原本好勁,但係後尾塞車,同隻「赤兔寶駒」撞嚟撞去爭位,結果輸咗得第六,如果冇受到低咗應該有權跑入前四;上次希威森跑發揮差劣,韁繩亂晒籠,又比隻「大武士」封咗塞車,見大勢已去就收慢,敗仗不足為據,今次落返嚟三班梗係有級數,如果對手失準,呢啲馬跑入三甲甚至乎贏都唔出奇,重返贏馬路程,有賠率嘅話可以試吓。

第六場四班1400米 — 塑料喜 形勢有利  呢場賽事完全冇步速,同時充斥着一批排外檔嘅後上馬,「塑料喜」可以擺喺前面走,賺慢步速,評分有利,冷門要拖番做腳。

第七場三班1200米 — 同樂日 力求交代 又係一場未必有太多放頭馬的賽事,搏久休復出的同樂日,上季多次喺三班短途上名,反應係三班有一定嘅競爭力,以佢嘅來歴同經驗三班有級數,今場可以擺喺較前位置,沈集成今季手風好順,今舖有權搏主要對手「友瑩囍」同「牛角仔」磅重偷襲!

熱門心水

第二場四班1200米 — 英明勇將 四班健將 上次喺三班強組賽事已經輸近,三班千二路程專家,落四班惡氣十足,今場坐位望贏!  第三場國際二級賽1200米 — 大藤王 一雪前恥 上次一千米快放當熱身,都輸得唔遠,今次對手唔強,有權重返凱旋門。

第五場四班1600米 — 芙蓉莊 檔靚拼盡 近呢幾次排位唔好,佢係一隻相當重口嘅馬,排外檔難留,但都所負不遠,今次排靚檔,強配擅騎後上馬嘅杜美爾,可使出強勁嘅爆發力重返久違嘅凱旋門!

第十場三班1400米 — 友誼至好 望空爆發 上次賽前準備工夫做到足,諗住可以一擊即中,點知直路大塞車,完全冇望空,敗績完全可以抹去,今次捲土重來,配上華將一哥何澤堯,上季連夏禮賢都可以跑近,今舖一定要再留意!

今次賽事提供八匹重心,大家鍾意可以過關投注。最後再次提提大家,由今次賽事至年底,沙田日馬將會提早至十二點十五分開跑頭場,大家記得留意,祝各位贏多多!



By: 賽馬全方位


(Photo: Ramos)