• 競馬知舍

【賽馬全方位】好運齊來金碧科

大家好!我係Facebook專頁賽馬全方位版主,啲人話週六容易爆冷,今次週六賽事將會提供兩匹冷門心水俾大家參考:


頭場五班千六米:好運齊來轉倉一放到底

頭場賽事冇乜放頭馬,全組剩係得好運齊來具備前速領放,呢隻馬轉左去高伯新度,目的都係想快啲交代,打開勝利之門。而上季呢隻馬嚟到五班已經多次跑得接近,尤其係喺快活谷一哩領放策略跑得最好,呢隻均速馬呢場賽事有權把握慢步速形勢,一出閘放頭走;而呢隻馬雖然上季經常跑開跑馬地,但係上季曾經喺嫌短嘅沙田五班千二米跑第三,相信沙田性能冇問題,再加上C跑道放頭馬唔輸蝕,呢場賽事有權轉倉第一鋪,好似同廐嘅帶榮來,即刻有表現交出,冷門可以拖一票。


第五場四班千四米:金碧科後來居上

呢場賽事同頭先五班千六米唔同,會有三四匹領放馬,當中包括上次靚時間贏得好出色嘅「精簡最好」、仲有「瀟灑王子」、「銀時」同「 軒轅齊飛」四匹馬走,相信會有一個偏快嘅步速,一啲排好位嘅後上馬可以優先留意,呢場我揀咗「金碧科」呢匹半冷門,因為佢今次排咗個好檔,有權透過守好位賺快步速,爆發一段強橫嘅後勁,需知道佢係四班千四米嘅路程專家,以往場場都爆發力勁,今次形勢上應該幫到佢;至於上次季內初出跑第七名,表面上好似跑得唔好,但係其實上次賽前準備功夫唔夠,只係跳咗六課快跳冇試閘就出嚟跑,經過上次嘅熱身,相信今次應該有進步嘅表現!


如果想知道其他場次心水,同埋過關推介,可以去到我Facebook專頁賽馬全方位,所有心水一覽無遺!提提大家聽日都係1:00開跑,由10月20號開始,沙田日賽頭場開跑時間會提早至12:15。最後祝大家贏多啲!



By: 賽馬全方位


(Photo: HKJC)