• 競馬知舍

【賽馬全方位】郭能 x 高伯新 冷腳孖寶

大家好!我係Facebook專頁賽馬全方位版主,目前其中一位仲未開齋贏馬嘅騎師就係郭能,老實講,我同唔少馬迷一樣,覺得呢位騎師唔善於走位,鞍上策騎馬匹動作太大,尤其係佢條左手鞭太重,有時候根本好多馬都適應唔到佢嗰種騎法。雖然我對呢位騎師冇乜好感,但係今次賽事我覺得佢有幾匹馬值得留意,尤其是係有啲賠率,我覺得大家不妨做腳拖一拖。


頭場五班千二米:一號鋒仔 落班質新有權突襲

快活谷中下班短途賽事大多質素參差,有好多馬都係上咗年紀或者評分已經盡左嘅馬,所以通常有唔少有質素但係狀態未夠嘅新馬,會揀跑馬地短途賽事出擊,因為對手弱得滯,今次我揀咗隻「鋒仔」,或多或少同佢落咗黎五班有關,畢竟四五班水準嘅差距相當大,好多落咗黎五班嘅新馬,狀態未必夠,但係可以憑着個質素搭夠,殺班老弱殘兵措手不及,而呢一隻馬,上季跑過跑馬地幾次,都輸得唔遠,同埋佢次次都拉住留後,但佢上季試閘曾經擺喺較前位置名次比較好,由此可見呢啲馬唔係完全冇前速,今次排咗喺二檔,再加上落嚟五班速度大有不同,呢場賽事快馬唔多,相信出閘之後可以擺喺較前位置,充分把握有利形勢跑入較接近嘅名次,老實講信心唔會太大,但係我覺得可以搏下佢跑到三三四四,反正有啲賠率。


第五場四班1650米:一號贏科超影 冷P可試

呢隻馬係四班1650米跑過兩次,成績1W1Q,由此可見係四班同程佢有一定競爭力,亦都有級數,晨操見到呢隻馬有啲搶口,再加上排左12檔,又係郭能騎,所以就算落班睇賠率都比較冷落,本來我都驚,但係我覺得呢場賽事除咗「肥仔威威」同埋「情趣」之外,其他馬喺呢個分數都好似冇乜上升空間,呢場係一組水準較弱嘅四班1650米,有見及此我都拖番佢,反正呢個係佢嘅首本路程,再加上聽日高伯新成手馬部署,我覺得呢隻馬位置Q可以拖番佢做腳,但係老實講郭能騎外檔後上馬我係好有戒心,純粹只係覺得賠率可觀,大可一試!


如果想知道其他場次心水,同埋過關推介,可以去到我Facebook專頁賽馬全方位,所有心水一覽無遺!最後溫馨提示,聽晚跑馬地會跑九場賽事,頭場開跑時間6:45,大家記得預留時間提早投注啦!祝大家贏多啲!



By: 賽馬全方位


(Photo: Happy Wednesday / HKJC)