• 競馬知舍

【賽馬全方位】塑料喜冷腳之選

各位馬迷朋友大家好!我係 Facebook 專頁賽馬全方位,首先我要感謝競馬知舍提供平台比我喺度同大家分享下賽馬心得,由今次禮拜三賽事開始,每次我會喺度為大家提供幾匹心水冷馬俾大家參考。

今次嘅賽事我揀咗,三匹冷門馬匹俾大家參考:

塑料喜冷腳之選 首先係第四場四班千八米,呢場賽事預計步速中等偏快,領放馬有自然君子同埋塑料喜,今次我特別推介塑料喜,雖然佢排咗12檔,大家可能會覺得形勢會比較惡劣,但係呢一隻馬係一匹均速馬,排外檔憑佢嘅速度應該可以喺早段切入二疊位置,拍着自然君子跑,自然君子同佢都係快馬,均速馬快放可搏走甩,再加上呢場賽事其他後上馬,除咗快樂實在,都係一啲狀態唔好,年紀大或者近績普通嘅馬,係呢一組弱組場合,我覺得大家可以拖返塑料喜作為冷腳,老實講贏嘅機會真係唔大,但係賠率方面可以搏下三甲!

心慷慨可搏冷W 其次就係揀咗第五場賽事四班千二米,呢場賽事相信會有一定步速,例如菁年財駿,陽明滿滿同埋團圓豐收都會擺喺前面走,步速唔會慢,適合呢匹中置型嘅馬匹跑,其實呢隻馬評分已經好低,前季可以喺三班谷草同程贏馬,依家黎到53分,一定要搏殺,再加上呢場賽事有步速,啱晒呢隻馬跑,上次其實賽前功夫有啲缺陷,冇咗最後試跑,所以跑泥地千二米得冇咁好,得第六名,上次可以當熱身,今次唔同,賽前做足功夫,即使我覺得佢狀態得八九成,但係其他主要對手譬如健康在望千二米嫌短,王者奇兵轉彎唔流暢,愛添滿足紅褲日排外檔等等,相信可以憑評分有利,排好檔,賺步速,贏出久違嘅頭馬。

夢幻仙子位置不是夢 最後一隻馬就係尾場千二米賽事,呢場賽事我覺得好大機會係精神威勝出,所以我會揀下啲配腳,我覺得夢幻仙子有啲機會,晨操快跳相當吸引,睇返9月19號同22號嘅最後試跑,助手捉到實隻馬自動湧上,勁得黎唔急唔燥,精神好好,身型都好飽滿,狀態相當好,睇返果場部份實力對手譬如永同歡欣同埋越感排外檔,馬匹除咗天地人同英之星實力未見盡,其他都係一啲評分飽和嘅馬,例如安喜、最驫等等,對手水準唔強,佢自己本身狀態又好,評分已經跌到近季新低66分,上次跑得唔好無需理會,沿途有啲搶口,賽前亦都缺過功夫,狀態未夠,今次功夫正常跳到足,狀態提升,排左個好檔,有權跑入位置!


今次我嘅冷門心水有第四場10號塑料喜、第五場5號心慷慨同埋第九場7號夢幻仙子。如果想睇其他場次我嘅心水,可以去我嘅 Facebook 專頁賽馬全方位。睇返提提大家嚟緊將會跑9場,頭場開跑時間6:45,大家記住留意番時間,祝大家贏多多!



By: 賽馬全方位


(Photo: HKJC)