• 競馬知舍

超之選20200906

新一季又嚟啦!經過一個暑假之後,馬季終於開鑼!開季第一擊,今次就跑田草十場賽事,參戰馬方面,今次都有唔少馬都喺季前曾經試閘而且表現唔差,揀馬時都可以以呢點作為參考。騎練方面,今次最受矚目嘅就非大衞希斯同楊明綸呢兩徒孫莫屬。大衞希斯舊時喺香港有幾成功,相信比較年輕嘅馬迷未親身經歷過都略有所聞,而佢現今事隔十幾年後重臨香港,相信唔少馬迷都寄望佢可以再創一番佳績;至於楊明綸,上季尾就初次奪得分級賽,一吐烏氣,今季季初就密密幫大衞希斯操馬,而佢今期手握幾匹機會馬,當中大衞希斯嘅「友盈有款」更加係成為唔少馬迷熱捧嘅對象,且看呢對騎練喺新一季可唔可以有個好開始啦!


至於今期我會推介嘅馬係第五場四班1400米嘅「一代莊主」。一代莊主呢匹北半球ISG上季季中由葉楚航馬房轉去大摩馬房,直到季尾馬匹表現開始有走勢,最終亦能喺田草煞科日贏馬而回,更成為大摩在港榮休前最後一場頭馬。


去到暑假,「一代莊主」就由大摩馬房轉去霍利時馬房,而霍利時亦都不敢怠慢,早早喺七月尾時已經復操,八月中時亦安排馬匹試閘,交出唔錯走勢。如果大家有留意霍利時嘅操練手法,都會留意到呢個馬房近年甚少會為馬匹安排試閘,但係今個暑假佢反而安排咗半個馬房嘅馬試閘,以免好似上季咁遇上開局不順嘅局面。事實上,上季當呢個馬房嘅馬被安排試閘而交出走勢嘅話,當馬匹出賽時唔少都可以交出唔錯嘅表現,當中「又係熊」、「爪皇轟天」更加喺試閘後出賽而贏馬而回。以上種種,都反映到霍利利今季係銳意打快攻。


另一方面,「一代莊主」本身曾經贏1400米贏馬,路程根據就唔洗太過擔心,反而或者會有人會擔心佢嘅級數問題。的而且確,「一代莊主」只曾喺五班賽事交出表現,但係留意返呢匹馬本身係北半球ISG,初期表現唔好可以歸咎於馬匹進度未足,並唔能夠一口咬定馬匹能力不足四班,既然馬匹開始上力,可以憧憬馬匹仍有進步空間。而且「一代莊主」今次抽到7檔,檔位雖然唔係最好,但係比起「心頭好」、「凌駕」呢啲排外檔起步嘅馬都已經更理想。形勢方面,今場快放馬並唔算太多,要數可能放頭嘅馬可能係「心頭好」同埋未必放得出嘅「軍炮」,採取跑法前置嘅馬又少,變相步速亦未必太快。因此排中檔嘅「一代莊主」變相可以跟前守好位,藉此賺輕磅之餘亦賺取步速形勢之利。且看「一代莊主」可唔可以為霍利時打響頭炮!




634 次瀏覽