• 競馬知舍

超之選20200715

去到本季最後一次賽事,冠軍騎師就已經塵埃落定,練馬師方面就隨住姚本輝剛戰連中三元,奪冠形勢大好,不過呂健威今晚都強陣出擊,雖然反先有一定難度,但都可以睇下佢可唔可以絕地反擊;另外,今次亦都係大摩同蘇狄雄嘅最後一戰,都可以睇下兩者可唔可以交出頭馬,為自己帶來美好回憶。


今次我就有兩匹重心馬,恰巧兩匹都係丁冠豪嘅馬。


先講第六場三班1200米,「大師級」上賽心律不正後休戰已有五個月,期間長駐從化只操不賽,操練慢慢重拾正軌,試閘走勢亦相當唔錯。回港後馬匹由見習學員試多課閘,走勢順暢,亦明顯係作備戰最後功夫。畢竟馬匹都有一段時間冇出賽,體力上明顯地會比其他對手佔優,加上又抽到5檔起步,可望馬匹可以守好位,若然步速夠快,甚至可以為蘇狄雄掛靴前留下美好回憶。


另一匹就係尾場二班1200米嘅「怡昌寶寶」。「怡昌寶寶」近兩次出賽沙田表現大走樣,主因係氣管多血而影響表現,上賽後丁冠豪亦安排馬匹上從化訓練,換換環境。「怡昌寶寶」始終係體弱馬不宜頻搏,休息兩個幾月後再出賽一嚟可以賺體力,二嚟抖夠有返新鮮感都能夠幫助馬匹。今次「怡昌寶寶」換上初戰谷草賽事嘅周俊樂,變相馬匹只需負輕磅出賽,而今場亦唔算有太多馬搶放,步速未必會太快,形勢上對馬匹有利,可作半冷之選。




273 次瀏覽