• 競馬知舍

超之選20200304

踏入三月,今期係跑馬地百萬挑戰盃結束後第一次谷草賽事,賽事就回復返跑八場,頭場七點三,今期就冇乜高班馬,不過有幾場參賽馬機會都相對均勢,因此刨馬時都要花啲心思,用一用腦。 今次我就會推介一條四連環,就係頭場五班1000米。眾所週知五班賽事水準都係長期偏低,雖然有時候會明顯地高下立見,不過好多時都係要睇形勢做人,畢竟佢哋實力真係唔高。因此,今次就會揀呢五隻互串四連環: 「哈蝦王旺」上次再次降班出戰谷草1200米表現未如理想,賽後馬匹被發現有喘嗚同氣管有痰,賽績大可以抹走。事實上,馬匹季初時第一次落五班出戰谷草1000米即能勝出,升上四班後就力有不逮,顯然係四、五班升降機。儘管如此,馬匹級數在此組都已經夠用,畢竟馬匹曾在四班同程一再可以走入第四,對手轉弱下可佔上風。加上排4檔起步,只要守好位隨時有機會贏出賽事。 「八進」本身為自購馬,減分甚多下表現亦漸見穩定及競爭力,反映馬匹開始適應水土。「八進」在港未勝,但其實過往曾經能夠喺四班同程接近,都屬於四班不足而五班有餘之馬。今次潘頓唔願放手而繼續執疆,相信騎師心中有馬,不能不拖一票。 「萬事欣」本身已非年輕,戰鬥力亦不復當年勇,不過爛船都有三斤釘,而佢上個閘都仲有兩腳,反映馬匹雖老退,但如果放落五班並非完全冇戰鬥力可言。今次換上莫雷拉,即使贏唔到都可能靠騎功搭救,走入前四名。 「幸運大兄」本身跑法主動,過往出戰同程都成功一放到底,今次抽5檔起步又用上陳嘉熙,如無意外都係會立心搶放,爭取貼欄以穩佔先機。由於五班馬水準普遍唔高,呢類放頭馬一旦賺到形勢就有機會走入前列,因此今次都要拖埋佢。 「金剛秀」近仗表現回勇,操練亦都極之積極,馬房顯然有心搏殺。今次馬匹出戰唯一曾勝嘅谷草1000米,再抽到黃金1檔,形勢上亦都相當好跑,亦有機會為馬房爭取頭馬。 投注策略:「哈蝦王旺」、「八進」、「萬事欣」、「幸運大兄」、「金剛秀」四連環互串(複式四重彩互串亦可)



262 次瀏覽