• 競馬知舍

超之選20200219

星期三週中夜馬,今期就唔係跑谷草,而係本季第一次全泥夜宴。今次都係得八場馬,都有啲馬又再一次同場對決,就睇下誰勝誰負。另外,尾場二班1200米賽事都係有一批泥地好手,當中「仁者荃心」大熱大勇之餘又想出征杜拜,今次表現對佢而言都幾關鍵,就睇下佢可唔可以如願贏出賽事再去杜拜啦!


今期四連環我就揀咗尾場。呢場如無意外都係由「實力飛駒」搶前,再加上「豹子頭」抽到8檔,或需要立心搶放以免三疊望空,步速方面未必會慢,尤其是「實力飛駒」配上陳嘉熙,分段時間頗有機會比預期快。


心水方面就係以下呢幾隻:

「牛角仔」會係我嘅膽之選。「牛角仔」之前一路喺草地贏馬贏到呢個分,近仗反映馬匹現時評分喺草地嘅競爭力已經差唔多行人止步,亦只好轉場一試。睇返「牛角仔」血統,父系Darci Brahma有好多馬都能應付泥地賽事,馬匹本身亦有4x3 Northern Dancer Inbreed,足以證明馬匹有泥地血統。跑法方面,「牛角仔」本身採取跟前跑法,加上1檔起步,如無意外可以貼欄守好位,加上「實力飛駒」都幾有可能會拉快步速,變相「牛角仔」有條件去後發先置,喺既不落後太情而守好位嘅情況下,只負115磅嘅佢隨時係呢場嘅程咬金。


腳方面就有呢幾隻:

「仁者荃心」今季狀態表現長期見好,亦一再能夠喺泥地賽事勝出,出征幾近勢在必行,呢一刻嘅佢可以話係香港現時數一數二嘅泥地馬,即使負頂磅出賽都好,亦要尊重佢本身嘅能力,估計佢今次都可以坐亞望冠,係頗為穩陣嘅配腳。


「激賞」今季表現睇落一般,但隨著評分滑落,現時評分已屆有利水平,須知道「激賞」對上一次贏馬評分係94分。而「激賞」本身喺泥地賽事曾交出表現,亦同場贏過「仁者荃心」,以泥地績而言亦都算站得住腳。今次抽到4檔跟前走兼續用贏馬拍檔莫雷拉,要走入前四名相信唔難。


「好吉利」今次雖則抽11檔,但馬匹跑法本身被動,可預計馬匹出閘後都會守返較後位置。因為今次步速未必太慢嘅情況下,「好吉利」亦有機會喺後面如飛殺上。另一方面,「好吉利」特別在於近幾次係會一場草一場泥隔紗,今次又係草轉泥,或係馬匹出擊時機。


「錶之銳」今季適應水土後表現轉好,贏馬時姿態亦算輕鬆,只係上次漏閘先失準。早前馬匹試閘時出閘並冇大問題,沿途亦順走而回,上次嘅漏閘或只係偶一為之,其實可以俾多次機會佢。另外,今次馬匹初戰二班,同時亦只負113磅,數級上能否拍得住「仁者荃心」、「激賞」等或有待證明,但如果計埋馬匹個form、檔位同負磅,結合呢啲因素亦都唔能夠忽視佢。


心水:「牛角仔」拖「仁者荃心」、「激賞」、「好吉利」、「錶之銳」




214 次瀏覽