• 競馬知舍

超之選20200122

大賽過後,又去返谷草賽事,今期賽事水準就回歸平淡,當中好幾場第四班賽事水準都偏低。事實上,去到季中階段,一部分季初搏殺嘅馬一係早已交代,一係就贏上去贏到分盡為止,結果令季中時嘅第四班都充斥唔少屢敗屢戰嘅馬,又或者係進度未足嘅質新馬,因此投注時大家都要小心小心。


今場就搞搞新意思,就同大家分享一條四連環心水:


我就揀咗尾場三班1200米,首先睇賽事形勢方面,「極速駿馬」降班作賽,又用上陳嘉熙,只負123磅下除非大漏閘,否則都可以肯定「極速駿馬」會立心搶放。如果大家有留意有「極速駿馬」列陣嘅賽事,好多時唔少馬都會被佢一齊燒到腳軟,即使「怡昌寶寶」都不能倖免,因此可以肯定呢到步速都會幾快。


睇返往績,「極速駿馬」喺三班時的確曾經一放到底,不過當有馬同佢一齊放時,佢往往都會直路腳軟。而排1檔嘅「合衷共濟」正正可能係同「極速駿馬」互燒,而「合衷共濟」跑法都只得放頭一途,所以都幾可能出現兩敗俱傷嘅情況。


講返心水,我今次會用「加州多寶」做膽,因為「加州多寶」本身可以守中間位置,若然步速夠快可以喺形勢上取得優勢。賽績方面,「加州多寶」前次喺同班同程勝出,當日跑道形勢有利前置貼欄馬,但係佢沿途只係守中間位置,又未曾貼欄都能一攻而破,反映馬匹喺三班都有相當實力。今次用上更為穩陣嘅彭國年,可望再下一城。


配腳方面,我分別會要「知道必勝」、「手到回來」、「承你所願」、「清新動力」。


先講「知道必勝」,「知道必勝」上賽一放到底,不過今次抽到9檔,同場又有「極速駿馬」、「合衷共濟」,係擔心佢如果都搶埋一份就會有機會被燒死。好就好在佢大前次亦試過放唔出而守三、四位並沿途三疊望空都守到一席第三,都尚可以話馬匹並非只能領放,如果臨場縮後一格跑或有一線生機。講形勢,「知道必勝」要贏其實並非易事,不過尊重馬匹本身實力,四連環腳都會拖埋。


跟著「手到回來」,「手到回來」呢匹馬奇就奇在二班可以上名,但係落到三班就屢拼不果,呢組講Win都唔會到佢。儘管如此,馬匹都成日一再接近,亦不下一次四四五五,因此四連環亦不能忽視佢,尤其今次步速形勢對「手到回來」都幾著數,以佢往績而言,即使今次都不入三甲都可能追入一席第四名,所以我都會拖埋。


「承你所願」今季轉由韋達操練後成績明顯穩定不少,只係上次步速太快先表現失準。以實力而言,「承你所願」喺三班最多都只限於位置,不過勝在今次有莫雷拉助陣,縮程排大外檔相信都會留前鬥後,因此可搏馬匹藉步速走入接近位置。而「清新動力」同「承你所願」一樣,以馬匹實力而言都係三班尾四班頂之間,係好在只負115磅而抽到3檔起步,守位上都相信都可貼欄走,形勢上都頗有黃雀在後嘅感覺,只要交出上賽嘅追勢,都幾大機會跑入三甲。


四連環投注策略:「加州多寶」拖「知道必勝」、「手到回來」、「承你所願」、「清新動力」



96 次瀏覽