• 競馬知舍

超之選 20200129

大賽過後兩日又去快活谷跑馬啦,呢兩期相信大家都會好chur,因為呢兩日大家掃完口罩再掃食物,然後又要刨馬睇馬賭馬,少啲精神都唔得。今次繼續跑九場,而跑馬地百萬挑戰盃亦進入倒數階段,今次就有「正陽清風」同「轉數高」爭分,分別爭取升上榜首同三甲位置。另外,「精神威」今次回師谷草一哩,都係為咗爭分角逐打吡,不妨睇下佢可唔可以首勝二班賽啦!


今次四連環心水就揀咗第八場,二班1200米賽事。


首先會以「凱旋來」做膽。「凱旋來」初出時狀態仍未十足都可以同一班二班中堅份子接近,及後初降三班角逐同程都能壓過今季步入大熟期嘅「明駿之星」而勝出賽事,上仗重上二班出戰田草1000亦只負「遨遊戰士」,戰績絕不失禮。從賽績到晨操上,都可以睇到「凱旋來」愈見愈好,今次「凱旋來」抽到6檔起步,只要田泰安守到好位,走入三甲應不成問題。


腳方面,我就會揀以下呢四匹:

「年年旺」近幾次都排大外檔起步,結果跑法亦得被動,間接令馬匹一再後上不及。今次「年年旺」抽到1檔,跑法上相信可以彈性返少少,而且可以貼欄,形勢上遠比早幾次好好多,因此佢亦係可靠嘅四連環之選。


「牛角仔」過往都係出戰田草賽事,大前仗更曾贏過新勝賀年盃嘅「最合拍」,反映馬匹有二班能力,只可惜近兩仗表現回落,馬匹喺田草賽事似乎遇上樽頸位,今次亦轉場去對手冇咁勁嘅谷草上陣。以馬匹級數而言,「牛角仔」喺呢組都算有相當份量,縱使初戰谷草,四連環都要拖埋佢。


「永同歡欣」在港八戰全部都係谷草1200米,共獲得兩冠一亞一季兩殿成績,反而馬匹係路程專家之餘,亦都係一匹表現準繩嘅馬,因此即使初上二班,亦要尊重佢個績,因此亦會係我心中嘅四連環腳。


「禾道駒」同「永同歡欣」一樣,都係獨擅谷草1200米賽事,在港三勝六位都係來自此程,亦屬路程專家。「禾道駒」早兩仗嘗試新出路不果後返上從化試閘,表現亦都慢慢重回正軌,而且馬匹亦已接近兩個月只備不戰,體力上相對會比同場對手稍為充沛,若然馬匹跑返上季尾時水準,亦係一路奇兵。


至於點解會飛「君達星」,原因有三:一嚟評分加幅過快,二嚟今場對手級數比上兩仗高好多,現時賠率超賣,三嚟馬匹12檔起步,如果早段有馬頂或者俾馬燒都難以複製上兩次形勢。


四連環投注策略:「凱旋來」>「年年旺」、「牛角仔」、「永同歡欣」、「禾道駒」




148 次瀏覽