• 競馬知舍

超之選 20200127

新一年,祝大家年年豐收!除此之外,大家都要身體健康,出入記住要戴口罩,同埋緊記要洗手洗手洗手。今期就有三場令人注目嘅賽事,分別係第四場三級賽百週年紀念銀瓶、第八場四歲系列首關香港經典一哩賽同第十場一班賽賀年盃。呢三場賽事都好似睇落冇乜懸念,但實際上又冇一隻真係壓一,大家不妨拭目以待。


今次四連環心水我就揀咗第九場三班1400米。


呢場係85分上限嘅三班賽,因而今次都有7匹80分或以上嘅馬都選擇落班作賽。事實上,呢批馬入面,都有啲本身喺二班都有過表現,尤其以「標準猴王」係最為穩陣,因為佢以往曾喺同班同程贏過2次,亦曾喺二班同程入Q,只係因傷患而影響進度。今季復出後表現都一般般,直到上次卒之交出接近走勢,狀態亦慢慢回穩。今次馬匹落班守好檔,只要交出以往表現,贏馬並非難事,亦都會係我嘅四連環膽。


配腳方面,我會揀以下四隻:


「馬友冠」上次出戰谷草二班1200米賽事,賽前試閘後再出賽,喺強手林立下都能跑入第三名,都開始證明「馬友冠」能力非差。事實上,「馬友冠」季初時曾在同班同程入Q,1400米對佢而言都係合適。排外檔起步係要考考蘇兆輝功夫,只係霍利時嘅馬好開通常都會好一輪,可以搏佢今次落班食到級數走入一席。


「星運明爵」初出時出戰二班1400米賽事閘能上名,證明馬匹係有一定潛力,只係馬匹表現始終唔係太穩定,因為到依家都未能贏馬而回。今次「星運明爵」縮返落1400米兼降班,加上初戴眼罩,可寄望排5檔嘅佢有新鮮感而交出表現。


「美麗滿紛」同「星運明爵」一樣,都係曾經喺二班1400米賽事上名,但其後「美麗滿紛」表現似乎未能再進一步,今次亦都落三班一試。騎師方面,今次換上莫雅坐陣,抽到12檔相信都會立心搶放,而且又初戴開縫眼罩,只要莫雅唔係好似莫雷拉死捉的話,「美麗滿紛」相信都可以憑新鮮感放出。今次快放馬唔多,若然「美麗滿紛」放出,或可以藉步速之利走入前列,因此四連環都唔好漏咗佢。


呢組賽事入面,80分樓下嘅馬大多都唔係太吸引,唯獨是「順意寶」係可以列入四連環腳,因為馬匹今季轉去韋達後表現準繩之餘亦還我本色。上仗「順意寶」終能再次喺三班交出頭馬,儘管賽事水準點都比唔上以上幾匹所角逐嘅賽事,但「順意寶」勝在當fit之餘,上手亦真係用得唔多,俾韋達操練後漸漸露出本身潛力,加上佢今次守2檔負輕磅,隨時可以殺大家一個措手不及,四連環都要拖埋佢。


四連環投注策略:「標準猴王」>「馬友冠」、「星運明爵」、「美麗滿紛」、「順意寶」



115 次瀏覽