• 競馬知舍

超之選 20200108

事隔兩個星期,今期終於返到谷草賽事,亦係踏入2020年後嘅第一個谷草賽日。今晚亦如以往都跑9場,當中最矚目嘅係國際三級賽一月盃。列陣馬方面,大致上都係熟口熟面,而最特別嘅係澳門代表「聖靈之都」再戰香港,挑戰一眾香港高班馬。今次「聖靈之都」換上莫雷拉,亦成為咗熱門之一。到底佢又可唔可以挑戰成功呢? 今次趁有時間,想分析下呢場谷草唯一嘅分級賽: 講到一月盃,形勢方面相信都係會因「馬克羅斯」領放,而呢場都係少馬場合,早段步速如無意外都有機會由「馬克羅斯」主導。如果就咁睇步速,就好似「馬克羅斯」玩曬,只係呢匹馬本身並非穩定,上屆一月盃亦在全面優勢下只跑第四名。況且谷草賽事不時出現變奏,如果中途有馬變奏的話,「馬克羅斯」形勢亦會變得惡劣。因此呢匹馬除非有緣,否則都係少掂為妙。 再講「川河尊駒」同「鷹雄」,前者出戰路程不合嘅香港瓶,表現當然未如理想,話就話馬匹今次縮程600米,猶幸馬匹賽前曾試過一課1700米閘,走勢亦相當良好,縮程相信並非問題,而「川河尊駒」本來都有相當級數,因而亦要尊重其實力。只係怕馬匹要頂磅作賽,加上1檔起步若遇上變奏亦會有機會陣陣冚,甚至係被塞死,因此馬匹級數再高,都只宜作配。至於前屆盟主「鷹雄」就似乎早兩季已用得七七八八,今季表現亦一般,因此亦都不作考慮。 至於「精明才子」,今季表現雖然一場好一場差,但從試閘同操練中都睇到馬匹已經回復返以往嘅狀態,而箭頭亦都似乎鎖定呢場三級賽,今次用返巴度打衛冕戰,又只負120磅,只要守位冇大出錯,走入一席並非問題。 至於澳門代表「聖靈之都」,上次出戰莎莎婦女銀袋賽喺何華麟胯下跑入一席接近嘅第四名,當然上次何華麟發揮明顯有不足之處,今次換上莫雷拉不免會令人有遐想之處,只不過當「聖靈之都」單單如此就成為大熱門就明顯地超賣。首先,澳門馬好多時操練都比香港疏落,準備上或有不足;再者,「聖靈之都」未曾踏足過跑馬地,而現場環境都不明,可能簡單嘅雜聲燈光都影響馬匹情緒。論上次在港時嘅表現,話「聖靈之都」冇競爭力就未免太過份,不過如果要排的話,我只會預佢只能3344,如果拖四連環都可以作配,如果要做膽就炆水少少。 講埋比較低分少少嘅一批,「翠龍」、「幸福分享」、「非凡才子」近況都一般般,實力亦大致見盡,因此都不作考慮。 講咗咁多隻,仲有「協霸神駒」未講,而呢匹就係我嘅首選。「協霸神駒」本身並唔係一匹易發揮嘅馬,好在馬匹曾在利敬國胯下勝出賽事,相信利敬國都識如果發揮此駒。事實上,馬匹本身後勁凌厲,只係需要時間撻著,所以往往都會後上不及。因為抽到9檔嘅關係,相信都會採取留前鬥後策略。若然到時步速較慢,大可以提早中途變奏發力;如果步速較快,亦可藉後勁追回失地,以跑法而言亦都較為機動。而且馬匹近仗表現穩定,一再都可以交出後勁,而且又冇好似上面幾匹港隊高分馬一樣喺上個月出戰HKIR,體力上亦有佔優。當馬匹近況、形勢、體力等條件都合適的話,不妨可以冷敲「協霸神駒」。



101 次瀏覽