• 競馬知舍

超之選 20191215

返到田草賽事,今次係國際賽後第一個田草賽日,戲碼方面就當然比唔上上星期,又出馬陣容亦都略嫌唔算太過吸引。值得留意嘅係,今期係李寶利嘅告別戰,今次過後佢就會轉戰美國,都唔知幾時重臨香港。一於睇下佢可唔可以喺告別戰為大家留下美好嘅回憶啦!


今次我就會推介呢兩匹馬:


R5 霹靂狂龍

「霹靂狂龍」上次喺谷草初出,雖然以7個馬位之差跑第五名,不過該場頭馬「君達星」以5.5個馬位之差大勝,因此「霹靂狂龍」實際上只負第二名「精算八方」1.5個馬位。而當日「霹靂狂龍」喺末段都可以交出追勢,整體表現未必完美,但絕對可接受。今次「霹靂狂龍」轉戰田草兼增程,當然會有挑戰,不過呢匹馬嘅全姊本身喺1400、1600米上名,又贏過2000米賽事,因此增程並非無的放矢。雖然話呢組馬都有唔少曾經喺呢程有過根據,不過佢哋實力大致見盡,論能力又真係唔係太高;「霹靂狂龍」初出時都見到佢算有一定鬥心,而且今次賽事應有「瀟灑王子」同「明月昇輝」搶放,步速都未必會太慢。既然如此,不妨冷試一下質新嘅「霹靂狂龍」。


R6 開心大師

「開心大師」上仗出戰同班同程,只負「芙蓉莊」不足一個馬位取得亞軍,連同早前五班勝出一役,「開心大師」兩戰田草一哩獲得1w1q,馬匹亦似乎搵到出路。留意返上次「開心大師」抽外檔,沿途形勢其實唔算太多,而且上次係由陳嘉熙策騎,當時「開心大師」末段時片出片入,唔多唔少都影響到馬匹爭勝機會。今次馬匹抽到6檔,又換上騎功更好嘅何澤堯,只要交返上次嘅水準,要補中其實唔係難事。



140 次瀏覽