• 競馬知舍

知舍學術台:《秘書處》到底有冇如實反映歷史?

更新日期:2019年2月28日


Photo: Horse Racing Nation


「秘書處」當年以31個馬位攻下貝蒙錦標並成為三冠王,即使過咗四十年,強如 American Pharoah 同 Justify 都無法打破呢個記錄,都可以證明「秘書處」有幾咁神級。如果有睇開戲嘅馬迷,或者都會睇過《秘書處》(Secretariat)。顧名思義,呢套電影就係講「秘書處」由出世到成為三冠馬王嘅故事。


有睇《秘書處》嘅朋友,都會知道呢套戲另一條主線係講馬主 Penny Chenery 點樣將父親遺留落黎嘅牧場起死回生,以及係以女性身份打破喺馬場取得成功。不過,呢篇文嘅重點並唔係想講「秘書處」有幾勁。相反,今次我想同大家探討下《秘書處》呢套電影到底有幾忠於史實。



Q1:Penny係唔係好似電影入面所講,故事開出時(1969年)只係一個對賽馬一知半解嘅家庭主婦,直至父親 Christopher Chenery 身體出現問題先接手經營連年虧損嘅 Meadow Stable?


A1:佢喺1949年同 John Bayard Tweedy 結婚後的確生咗四位小朋友,同埋變咗個家庭主婦。事實上,Penny 係因為父親健康問題先接手牧場,但成件事1968年2月時已經發生。因此亦唔係好似電影所講,Penny 喺1969年先接手牧場。另外,Penny 母親早於1967年已經過身,因此亦不可能好似電影咁講 Penny 收到母親死訊先返娘家,再發現父親出現健康問題先接手 Meadow Stable。



Q2:Penny接手後炒咗一直為家族練馬嘅練馬師後,如何搵到 Lucien Laurin 幫佢練馬?


A2:電影版本就話喺 Bull Hancock 介紹下,Penny 先知道 Lucien Laurin 呢位準備退休嘅練馬師,並三顧草蘆咁游說佢出山。不過事實上Bull只係建議 Penny 請 Lucien 個仔 Roger 管理馬房。至於 Lucien 點解得以為 Chenery 家族練馬,係因為 Roger 喺1971年過檔幫 Ogden Phipps 練馬嘅同時,佢又向 Penny 推薦返佢父親,所以 Penny 先請咗 Lucien Laurin 幫佢練馬。



Q3:電影入面,Penny 父親本身同 Ogden Phipps 呢位大馬主有協議,將旗下兩匹雌馬Somethingroyal 同 Hasty Matelda 去同 Bold Ruler 配種,再以擲硬幣的方式決定兩匹雌馬所誕下嘅馬匹誰屬。最後 Ogden 揀咗 Hasty Matelda 嘅產駒,而代表父親 Penny 就要 Somethingroyal 嘅產駒,亦即係日後嘅「秘書處」。到底Penny係唔係就咁拎到「秘書處」?


A3:冇錯,當年 Chenery 家族提供兩匹馬女,而另一邊就安排 Bold Ruler 同兩匹馬女配種,然後以擲硬幣的方式決定兩匹產駒嘅擁有權。不過成件事又又又同現實有出入嘅!Somethingroyal 同 Hasty Mateldal 喺1968年同 Bold Ruler 配種,而 Penny 喺1969年再安排 Somethingroyal 去同 Bold Ruler 配種,亦安排咗 Cicada 同 Bold Ruler 配種,而非 Hasty Mateldal。


不過由於 Cicada 未能受孕嘅關係,雙方亦協議好擲硬幣嘅勝方可以先選擇1969年出生嘅產駒,敗方就可以拎另一匹1969年出生嘅產駒,以及1970年出生嘅產駒。擲硬幣結果的確係Phipps勝出,但係佢係揀咗 Somethingroyal 喺1969年誕下嘅產駒,而 Penny 除咗拎到 Hasty Mateldal 誕下嘅產駒之外,亦獲得 Somethingroyal 喺1970年誕下嘅產駒,亦即係「秘書處」。



Q4:「秘書處」初次出賽輸咗之後就立即換人?Penny 同 Ron Turcotte 又係唔係因「秘書處」先開始合作?


A4:「秘書處」初出喺 Paul Feliciano 胯下的確只跑第四名,不過 Paul 下一次都成功幫「秘書處」補中嘅,亦即係話 Paul 其實一共騎過兩次「秘書處」。另外,Ron Turcotte 一早已經同 Penny 有合作,而 Ron 早喺1972年時已經憑 Riva Ridge 幫 Penny 拎咗肯塔基打吡同貝蒙錦標。



Q5:承上,如果有 Riva Ridge,Meadow Stable 仲點會好似電影咁講有財困危機?


A5:留意返,電影入面嘅《秘書處》其實係平行時空,因為佢係直頭無視咗 Riva Ridge 嘅存在。事實上,Penny 初初接手 Meadow Stable 時,佢係成功令 Meadow Stable 轉虧為盈。此外,「秘書處」出賽前,Meadow Stable 已經有 Riva Ridge 呢匹贏出美國三冠頭尾兩關嘅馬,而佢亦都 Meadow Stable 賺取大約110萬美金,因此當時嘅 Meadow Stable 理論上並唔會好似電影咁講真係蝕到入肉。



Q6:電影入面有講到「秘書處」喺1972年7月時喺 Saratoga 贏咗場賽事,而嗰場係唔係盃賽?


A6:冇錯,佢的確喺1972年7月時喺 Saratoga 贏咗場賽事,但當日佢並唔係好似電影咁講贏超過兩個馬位,佢其實只係贏1.5個馬位。另外,如果睇返「秘書處」出賽記錄,佢喺1972年7月跑過兩場,一場係Paul成功補中嗰場,而嗰場只係 Maiden 賽事;至於另一場就係 Ron 初次同「秘書處」合作,而呢場頭馬正正喺 Saratoga 馬場取得,不過嗰場亦只係 Allowance 賽事。



Q7:Bull Hancock 同 Chenery 家族有咩關係?到底係 Bull Hancock 定 Christopher Chenery 過身先?


A7:Bull 同 Christopher 本身都係從事育馬業,而 Bull 其實一直都係同 Chenery 家族關係良好,正如上文所講,Bull 都有為 Penny 提出過一啲意見。如果簡單少少講,Bull 算係當 Penny 係世姪女咁看待。如果講兩邊嘅關係,《秘書處》入面大概都冇講錯;不過,Bull 早喺1972年9月已經過身,而 Christopher 就係1973年1月過世,所以 Bull 並不可能好似電影入面所講會出席到 Christopher 嘅喪禮。



Q8:《秘書處》入面嘅 Pancho Martin(即 Sham 嘅練馬師)係一個又臭串又冇風度嘅人。現實中嘅佢咪好似電影咁描述?


A8:電影入面嘅 Martin 係好有自信,亦都係有啲招搖嘅口水佬。事實上,現實中嘅佢都係咁嘅人。Sports Illustrated 前記者 Whitney Tower 就話過 Martin 係一個好多嘢講又有自信嘅人。佢都提及過 Martin 成日都同 Lucien 打口水戰,尤其是當 Sham 同「秘書處」同時爭緊美國三冠嘅時候。不過,Lucien 好多時都會選擇專心練馬,唔太理呢啲閒言閒語。


不過縱使佢再幾多口水都好,佢又未去到會下下咄咄逼人,甚至乎會串Penny身為女性就返屋企湊仔做家務。事實上,Penny 晚年時有提及過佢其實根本未見過 Martin,所以 Penny 同 Martin 理應都冇試過如電影所言有過唔止一次口水戰。更重要嘅係,Pancho Martin 本人直接話《秘書處》入面嘅 Pancho Martin 根本就反映唔到真實嘅佢,而佢亦都為呢件事大動肝火。另一方面,Ron Turcotte 本尊都有為 Martin 平反,話 Martin 本身份人都幾好,替佢被抹黑而不值。


另一個角度睇,Martin 徒弟,現時同為練馬師嘅 Gary C. Contessa,就話佢似一個嚴父。雖則脾氣係比較火爆,作風都有啲瘋狂,甚至乎唔會俾人放假;但係佢其實會關心人,去到聖誕都會送一人一份禮物。



Photo: Sports Illustrated


要將真人真事改篇成一套電影,某程度上都會有一定難度。比如當事人早已不在人世的話,縱使編劇嘗試忠於事實也好,有啲事實可能永遠都陪伴住當事人長眠。就好似奧斯卡最佳電影《綠簿旅友》咁,依家兩名主角嘅後人點樣爭辯都好,只有兩位已逝去嘅當事人先最清楚彼此之間嘅關係。


不過,如果編劇為咗過份神化某人某事而唔做好資料搜集,甚至扭曲事實的話,咁就只會貽笑大方。《秘書處》雖然都有講「秘書處」有幾叻,同埋 Penny 點樣取得成功,不過如果要搞到刻意醜化其他角色,又或無視史實事件以抬高佢哋嘅時候,咁又同否定某啲名馬同埋賽馬名宿嘅歷史地位有乜分別?



By 超仔

338 次瀏覽