• 競馬知舍

【2020 育馬者盃前瞻 Day 2】

去到育馬者盃週六賽事,各個年長馬組別對決,本文揀咗當中五場賽事簡單介紹,今次先由重頭戲,尾場育馬者盃經典賽講起。



育馬者盃經典賽:Tiz the Law 大戰巴富達三雄,卓華斯、貝蒙錦標盟主 Tiz the Law 飲恨打吡後一直收起,回到足等跑今仗,而且一早運到堅蘭操練以逸待勞,但排 2 檔就極考騎師如何應對對手圍攻,要走生位。巴富達三匹排晒最外三個檔,沙特盃冠軍 Maximum Security 級數理應最高,但上仗於再度驚喜錦標表現失望,從近兩年此賽落第熱門 formline 去計難免要打少少折扣,反而該仗頭馬 Improbable 今年大熟大勇近況最好,亦勝在跑法具彈性,小心再下一城。至於 Authentic 打吡贏馬一役似乎有點神來之筆、偶一為之,因為於打吡前一仗、後一仗都見演出有落差,水準成疑。其他馬方面,By My Standard 以及 Tom's d'Etat 兩匹二線實力,純跑忠心;鴨都拿名下 Tacitus 實力見盡,喺美國跑已經冇殺著,但如果下年三月肯跑杜拜又不妨留意。



育馬者盃草地大賽:另一場精彩對壘,牌面上岳伯仁一對仍然秤先,「變魔術」(Magical) 前屆力迫 Enable 跑亞軍,哩半未必太大問題,本身都多次證明有馬王級實力,上仗英國冠軍錦標未用到最佳跑法,今次 2 檔希望唔好重蹈覆轍,廄侶「業界巨頭」(Mogul) 巴黎大賽終現真身,兩匹蹄下敗將再出跑凱旋門大賽分列二四名,已見水準,抽 10 檔就考布達德發揮。阿加汗名下「大利威」(Tarnawa) 連贏紅寶、歌劇錦標,充滿幻想空間,但兩場都係雌馬賽,水準未算最高,今場似乎要再有進步先足以奪標。「諾斯勳爵」(Lord North) 最近兩場完全承接唔到,想反問一下點解威爾斯親王錦標會贏得咁誇張。反而上屆亞軍 United 今年五戰幾乎全勝,雖然今戰為轉投萬迪拉馬房後初次離開加州作賽,但跑出水準必屬主隊希望。



育馬者盃雌馬大賽:Swiss Skydiver 鬥 Monomoy Girl。原本 Swiss Skydiver 一早報跑育馬者盃經典,但最後決定重返馬女組別,上仗必利是錦標鬥贏雄馬,放落經典賽都未必見下風,如今硬撼前屆盟主兼馬后 Monomoy Girl,部署是否明智就等賽果決定,但從馬迷觀賞角度而言都未算係壞事。



育馬者盃一哩:英國二千堅尼冠軍「佳明驥」(Kameko) 抽到 2 檔,配合此駒有口勁而擅短程爆發,應該相當煞食。主隊方面當然以草地王白偉賢麾下三駒最具勝望,三匹都係年內一級頭馬,即使從 rating 角度去分析,三匹馬依然不相伯仲,沿路形勢分高下居多。反而有匹熱門背景相當有趣,日本父系、巴西出產、阿根廷服役,今年轉到美國,新勝同場同程一級賽嘅 Ivar,底牌未見盡之輩。至於「大競賽場」(Circus Maximus)、「金衣公子」(Siskin) 一對踏入今年停止進步。



育馬者盃短途:今年泥地短途組別換上一批新面孔,大熱門 Yaupon 三歲仔四戰全勝,純跑速度,排 10 檔多數盡搶,但經驗尚淺去到最高水平賽事始終有考驗,廄侶 Echo Town 亦不容忽視,同樣係三歲馬但有多五場經驗,更已經係一級賽頭馬,今仗加眼罩抽 1 檔,現時賠率似乎太冷。C Z Rocket 今年於標售賽中被標中易主,轉投苗利雅馬房後五戰全勝,今仗贏埋必成佳話。Diamond Oops 新勝同場同程堅蘭鳳凰錦標亦屬正路之選。Whitmore、Firenze Fire 一對短途常客要等對手失準先有機可乘。



by 鹿



159 次瀏覽