• 競馬知舍

【2020 育馬者盃前瞻 Day 1】

今年美國育馬者盃於堅蘭馬場舉行,受武肺疫情影響,閉門作賽就無可避免,參賽單位方面,歐洲代表總共 29 匹正選出賽,岳伯仁、高仕登等大馬房都有參與,更見到有香港馬主綵衣參戰,反而高多芬歐洲分部則近乎全線缺席。


兩個賽日前後 14 場大賽,今日本文先會同大家講咗 Day 1 - Future Star Friday 嘅焦點。


由前年開始主辦單位將傳統育馬者盃週五賽日打造成 Future Star Friday,上演 5 場育馬者盃全屬兩歲賽事,兩歲賽事向來鬥進度同際遇,不明物體爆冷見怪不怪,而今年就有好幾匹往績亮麗嘅熱門,看似優劣分明嘅場合,睇吓能否順利跑出,先由兩歲草地短途揭開戰幕:


以堅蘭作主要基地嘅華特,出名專練兩歲短途,上屆此賽亦係由華特捧走,今年主場作賽可謂如虎添翼,由應屆英國皇家雅士谷諾福錦標亞軍「友情比金」(Golden Pal) 率領另外三匹廄侶,似乎非勝不可。可與華特抗衡嘅對手就可能係一對剛於同場同程熱身賽包前兩名嘅 Bodenheimer 同埋 Cowan 會較有威脅。


華特另一匹新星「鈴兒花」(Campanelle) 喺英國贏完瑪麗皇后錦標,再到法國攻陷莫尼大賽,今次一下子由短途扳上一哩,跑育馬者盃兩歲馬草地大賽,級數壓一但長力成疑,早幾年有匹同類份子「慶祝派對」(Hootenanny) 於戴圖理一絕發揮下僅僅扳到,今次「鈴兒花」能否照辦煮碗就更考戴圖理留放了。


至於泥地賽方面,決定兩歲后冠誰屬嘅育馬者盃兩歲雌馬大賽,有匹全日焦點登場,巴富達馬房嘅 Princess Noor,對上兩仗不費吹灰之力合共贏 15 馬位,典型巴富達怪物級演出,難怪今場只得 6 匹對手敢赴會,其實當中都有一級賽頭馬,但相比之下風頭已被 Princess Noor 蓋過,且看能否順利跑出。


馬仔方面,育馬者盃兩歲馬大賽,由兩匹一級賽冠軍擔大旗,高多芬旗下 Essential Quality 鬥 Jackie's Warrior,兩駒跑法相若,硬要比較就以後駒有較多出賽經驗之利,至於巴富達就有匹 Classier 兩個星期前先初出即勝,第二仗就已經攞出嚟跑大賽,又有冇咁犀利呢?



by 鹿


(Photo: Keeneland)

289 次瀏覽