【競馬磚提】育馬者盃係大熱修羅場？

今個週末美國舉行一年一度馬壇盛事育馬者盃，兩日賽期總共 14 場育馬者盃賽事，今屆將會由堅蘭馬場主辦，香港馬會連續第二年轉播當中兩場賽事，所以今集專題亦會圍繞育馬者盃。

上年馬會轉播育馬者盃賽事分別為草地一哩以及草地大賽，結果兩場草地賽都由高多芬旗下歐洲馬「太空藍調」、「伊比爾族」贏出，而今年所轉播兩場賽事分別為草地大賽以及經典大賽，講解今屆賽事之前，不妨先回顧近屆同項賽事賽果：草地大賽近三屆頭馬 Yibir、Tarnawa、Bricks and Mortar；經典大賽近三屆頭馬 Knicks Go、Authentic、Vino Rosso；可以發現上述 6 匹頭馬中，只有 Bricks and Mortar 屬大熱身份，如果再進一步，將時間線拉長少少，翻查近十屆這兩項賽事總共 20 場賽果，會發現 20 場當中只有 4 匹大熱門贏馬。

所以第一個問題，究竟育馬者盃大熱門馬表現如何呢？根據 Attheraces 數據顯示，近十五年育馬者盃各場賽事大熱門總勝出率有 27.9%，筆者本人因時間所限，只搜集了近十年育馬者盃非兩歲馬賽事的各場頭馬資料作補充，結果顯示大熱門勝出率都有 28.8%，而縱觀全球各個主流賽馬國家大熱勝出率，其實都維持在 30% 左右水平（香港 29%），所以數字上，育馬者盃大熱表現並非異常地差。

第二個問題就出現了，既然育馬者盃整體大熱表現合符預期，何解上文所提到，全個賽期最高獎金兩場賽事 ─ 草地大賽以及經典大賽，亦即今次轉播兩場，大熱表現又如此不堪呢？筆者就嘗試分開兩場賽事獨立推敲。

育馬者盃經典大賽