杜拜前瞻 - 13 Feb 2020

Hawaii

12 February 2020, 5:42:27 am

杜拜世界盃嘉年華來到第7個星期,有咩賽駒值得留意?睇睇今期杜拜前瞻喇!

杜拜世界盃嘉年華來到第7個星期;

雌馬二級賽百利錢錦標,Magic Lily再戰Nisreen,兩馬在維迪角錦標鬥足一條直路,最後Magic Lily以短馬頭險勝,兼打破草地1600米紀錄時間,增程200賽果又會如何?該仗大後上跑第4的土耳其馬Peri Lina繼續列陣,今仗能否給予威脅前兩馬?而去年阿聯酋橡樹盟主「大同仙景」(Divine Image)亦會在這場草地賽事復出。

另一場分級賽防火線錦標,可能為全晚重點的美國馬Quip登場,昨年贏出奧克朗園讓賽,緊接在一級賽史提芬科士打讓賽以短距離見負,級數名氣似乎能壓過其他賽駒。去年在嶺飛膠沙中距離冠軍錦標大勝7個馬位的「馬特洪峰」(Matterhorn)終於試跑泥地,歐洲馬不去美國的話就只能在杜拜測試其泥地能力。其他高分馬分別有首輪挑戰賽僅敗的「胸懷抱負」(Secret Ambition)、衛冕冠軍「滿蹄灑」(Muntazah)及「甲勝蘆」(Capezzano)等列陣。

第3場的泥地1200米讓賽,落地第一仗即在杜拜威錦標跑第2的Truck Salesman降格回讓賽角逐,當然要負最重磅上陣;去年殺聲震天但表現一般的「歐陸陽台」(Switzerland)今年由讓賽重新出發;而Doug O'Neill的Prodigal Son由草地轉戰泥地,馬主騎練組合上星期已憑Fore Left贏出阿聯酋二千堅尼,又一匹黑馬?尾場2400米讓賽16匹參賽馬高多芬佔8匹,當中Magic Lily全弟「滾滾圓石」(Jalmoud)閹後復出,最佳表現曾在巴黎大賽跑入季軍,將由布宜學策騎。