【Finding 嘉麗】自宣布回港三星期 蘇嘉麗音訊全無？

Homan

30 November 2021 at 2:48:21 pm

一直於澳洲擔任見習騎師嘅蘇嘉麗，南澳賽馬會嘅社交帳戶於11月9日公布蘇嘉麗即將回港。當時不少傳媒都報導蘇嘉麗將會回港出任見習騎師，然而不足一日該社交媒體貼文被刪除，而各傳媒就再無更新蘇嘉麗嘅情況。

距離上一次傳媒報導，已經隔左三星期。無論馬會、其他傳媒都未有進一步公布。坊間有一些猜測指蘇嘉麗是次回港並非出任見習騎師，而係要求佢改任騎馬人，情況與勞景晹同期嘅劉泓相若。至於呢個猜測是否屬實就不得而知，因為傳媒似乎都問唔到，馬會亦無相關公布，蘇嘉麗或許仍隔離中。

據馬會對外公布嘅訓練課程介紹，香港賽馬會每年以公開招聘方式，招聘一班年輕人成為賽事見習學員，並於基礎課程接受培訓。學員修畢課程後會可向唔同方面發展：見習策騎員、馬術事務助理及見習騎師學員等（見下圖，取自 https://campaign.hkjc.com/ch/racing-trainee-recruitment/career-path.aspx ）。

當中蘇嘉麗相信以見習騎師學員身份到海外受訓，而根據見習騎師學員嘅晉升機會，最終係成為騎師，並番到香港策騎。但無論上次劉泓、今次蘇嘉麗都唔能夠晉升成見習騎師，究竟係個人選擇定條件不合呢？若然去到海外受訓都不能夠促使見習騎師學員晉身見習騎師，究竟學員點先可以晉身見習騎師呢？當中考慮嘅因素包括啲咩呢？係成績？係年齡？係人脈？定係香港馬圈情況呢？而呢啲條件，身為當事人嘅見習騎師學員又是否知道呢？

事實上，公眾人士都應該可以知道有關條件，畢竟佢地可以係未來有意投考或推薦其他人考投嘅人。否則唔知頭唔知路去考，又以為可以做騎師。結果原來內裡要符合一定條件，最終騎師夢碎，到時要轉到海外發展又太遲。倒不如一開始就投考外國騎校可能仲好。咁樣可能會令有意投考者一早放棄香港，轉到第二度發展，相信呢個唔係大家樂見嘅情況。

Source: Racing SA, HKJC
Photo: 東方日報, HKJC