Tony

15 December 2021 at 6:55:48 am

呢個星期睇完香港同日本加埋5場一級賽，又係時候去返日本睇三場賽事。

首先係星期六早場三級賽中日新聞盃，Tony愛駒「頌讚角宿」(Admire Virgo)夠鐘出場，仲要最後捧成4.1倍大熱開跑，賽前都問一句唔係最重磅可以點輸？起步3檔跟到前跑冇做錯，但係入到直路騎極唔郁，大大個空檔比後面Boccherini拎埋結果跑第10，一上到重賞場場輸到冇影前景都幾淡，下場跑乜好？至於呢場跟前嘅馬除咗「頌讚角宿」之外差唔多冇隻斷，Shonan Bardi呢隻鳴尾紀念亞軍嚟到今場慢放，轉彎入直路再騎一騎彈甩全程跟住佢嘅「非洲寶金」(African Gold)，順利一放到底，岩田康誠亦都成為第一個地方出身贏出100場JRA重賞嘅騎師。
https://www.youtube.com/watch?v=TVqIuLur7ps

到國際賽日，香港瓶同短途錦標中間亦舉行亮星錦標，三浦皇成冇得騎Namur跑一級賽就騎「舞林驕子」(Dancing Prince)，今場點都唔夠「魔族閃焰」快搶唔到頭㗎啦，守住第2位一樣冇問題，入到直路騎兩下就已經出頭，後面「龍野雪驥」(Ryuno Yukina)追極都追唔到，結果「舞林驕子」贏出呢場三級賽拎咗利雅德泥地短途錦標入場劵。賽後訪問幕後就話有意去沙特，睇下有冇機會再下一城贏到呢場三級賽。
https://www.youtube.com/watch?v=GUT3NlSb3hU

知舍POG全個星期得一匹馬贏到，星期六阪神2歲1勝條件賽Erica賞，Satono Helios由川田將雅換岩田望來上陣，沿途守住第5位，入到直路一騎就好好反應，雖然中間比對手阻一阻，不過之後上完斜再騎兩步就壓住Vers Reims勝出，幫Patrick同Roy搶分。
https://www.youtube.com/watch?v=O2bczVzQviQ