【WASJ首日戰報】JRA選拔領先 武豊帶頭爭30年以來首勝

Homan

28 August 2022, 1:51:20 am

世界星級騎師大賽琴日起一連兩日於札幌競馬場上演。經過兩關賽事後,JRA選拔大幅拋離由六位外國騎師及一位地方騎師組成的世界選拔。

兩位JRA騎師武豊及川田將雅包辦琴日首兩關賽事的頭馬,武豊暫時以一冠一季得45分暫時領先群雄。武豊自1992年捧走過當時為WSJS的騎師賽冠軍後,就一直未能贏得當地騎師賽冠軍。

佢接受訪問時就笑問「可唔可以就咁就完喇?我一直都只可以取得第二名,已經唔知幾多十年無攞過騎師賽冠軍。」由上代騎師賽WSJS計起,佢已經贏左八個第二,三十年無攞過騎師賽冠軍。睇下呢位日本國寶最終能否如願喇!

現時排行榜頭三名都係JRA選拔騎師,順序係武豊(45分)、川田將雅(42分)及松山弘平(26分)。JRA選拔表現出色,令佢地現時得139分,以54分拋離世界選拔隊。而香港嘅何澤堯於兩關賽事分別得第十一及第六,以9分與柏姬迪並列第九名。

今日於香港時間下午兩點零一分起就會上演餘下兩關賽事,決出今屆騎師賽冠軍。

Source: Netkeiba, デイリースポーツ
Photo: 直播截圖