而悉尼盃方面，一對萬利安盃冠、亞軍成焦點。郗國思另一匹遠征馬Favorite Moon於萬利安盃贏馬，今仗繼續孭輕磅，繼續由麥維凱操刀。而亞軍Realm of Flowers都繼續由方達明執韁。而墨盃殿軍「精心挑選」（The Chosen One）繼續列陣，不過孭重磅應該幾難跑。而轉戰澳洲一段時間既前古摩亞賽駒「南法」（Southern France）近仗稍為走近，再增程會表現成點呢？
而草上女皇錦標方面，葉森讓賽及未來錦標冠軍「投機法寶」（Probabeel）上仗於All Star Mile幾乎無乜跑過，今次對手定都無咁強，而且轉配麥維凱，大熱門亦相當合理。濕地女王「花都教主」（Colette）縮番黎1600米，但預計場地仍為軟地（Soft 5），會唔會可以威脅到「投機法寶」呢？
全日最重要既女皇伊利沙伯錦標，暫時仍有七匹馬角逐。最矚目一定係上屆冠軍「加踏步」（Addeybb）及上年兩度僅負既「雍容爾雅」（Verry Elleegant）既對決。「雍容爾雅」今年狀態勇銳，今年於蘭威錦標已首次反先「加踏步」，不過後者賽前曾不良於行，今次兩駒相信可以最佳狀態應戰。計埋上年，現時「加踏步」領先2:1，究竟「雍容爾雅」可唔可以追和2:2呢？除左呢兩匹好手之外，All Star Mile冠軍「蠻勁」（Mugatoo）及寶馬錦標冠軍「龍子爵」（Sir Dragonet）都有力搞局，甚至重回貝湯美手中既玫瑰崗堅尼冠軍「至寶」（Mounga）亦不容忽視。
