Tony

21 December 2020 at 3:21:40 pm

今個星期日本仲有一場三級賽綠松石錦標，一齊同大家睇下！

星期六舉行嘅綠松石錦標，主角又落喺Smile Kana身上，今場柴田大知冇好似之前富士錦標咁狂放，而係一路守喺第3位，入直路冇幾耐就控制大局，力拒Andraste來犯，繼年初仙女錦標之後再贏三級賽，贏來相當出色；反觀另一中山專家、場地紀錄保持者Trois Etoiles就放到腳軟影都冇。講返Smile Kana，有時真係唔知榮進系對呢個母線子嗣點諗：留喺榮進牧場出世嘅子嗣都唔成材(包括佢阿哥「榮進好蹄」)，反而呢匹喺木田牧場出世、流出去拍賣會嘅馬女就贏出兩場三級賽加櫻花賞季軍，平井家真係唔慨嘆「點解要流出去拍賣會」都唔得！
https://www.youtube.com/watch?v=5AgD4J1fL5I

星期日中山有表列賽十二月錦標，上場跑日本盃嘅「雙星相伴」(Taurus Gemini)見吉田豊沿途均速咁放，入直路再彈甩對手取勝，後面守第3位嘅「里見少艾」(Satono Damsel)追足一條直路都係鞭長莫及；早前跑完菊花賞嘅「蘊藏豐富」(Galore Creek)揀今場復出，結果沿途留後對前面嘅馬冇乜威脅，最終影相影贏個第3。
https://www.youtube.com/watch?v=smKJFXSVQ1s

跟住加場精選條件賽：星期六阪神嘅1勝條件泥地賽，「睿智寶石」(Verdite)呢匹一出道就備受注目嘅一口馬，初出贏完之後轉歲跑幾場都輸成條街返嚟，包括寶塚紀念賽日轉播一役；不過今場轉跑泥地就趁對手偏弱，再加上少少泥地血統底子，一出閘擺喺前面，再喺直路趕過對手贏返一場，不過睇嚟以後要見到佢都好大機會係跑泥地賽架啦。
https://www.youtube.com/watch?v=Nrf_kOr2E58

Photo: Netkeiba