【Meiner系話事人「總帥」岡田繁幸突然離世】

Homan

19 March 2021 at 2:48:53 pm

一口馬主團體Thoroughbred Club Ruffian既前董事岡田繁幸突然離世，享年71歲。今日原本係岡田繁幸既71歲生日，但今早佢被發現離世，暫時死因仍在調查。

當地記者嘗試向Big Red Farm了解情況，但職員以事出突然未能聯絡到相關人士為由，表示未能提供詳情。據知，岡田繁幸近年身體轉差，腸道不時出現問題，而且不斷有原因不明既肚瀉，令佢相當困擾。已將各個牧場、一口馬主團體轉交下一代既岡田，上月出席Big Red Farm既種馬會時透露自己要減糖保持健康。

岡田繁幸既爸爸都係經營牧場（岡田スタッド），佢早年於日本讀獸醫，但未有完成課程後就去到美國留學學法，學成歸來後未有繼承牧場，並於1974年開設Big Red Farm，並於1986年開設一口馬主團體Thoroughbred Club Ruffian。

憑著出色既相馬技術，多次以低價購入既賽駒衝擊大賽，當中最有名一定係地方賽駒「大宇宙」（Cosmo Bulk，コスモバルク），呢匹地方馬成交價僅四百萬日圓（折合當時約四十萬港元）。初初於地方出道，及後轉戰中央，曾攻下2006年新航國際盃、二級賽彌生賞及聖烈特記念。埋單合計為岡田贏得約六億四千萬日圓（折合當時約六百四十萬港元）。其他Meiner系既一級賽冠軍有1998年短途馬錦標冠軍Meiner Love （マイネルラヴ）、2009年春季天皇賞冠軍Meiner Kitz（マイネルキッツ）。因為經常以下價馬挑戰大賽成功，因此亦有相馬眼天才既美譽。

雖然岡田一家財力不及社台一家，但一直以自己原則立足當地馬圈，深受敬重。而且幕後用人從一而終，柴田大知、松岡正海及丹內祐次等雖成績平平，但幕後一旦有賽駒可以衝擊大賽，都會起用呢堆騎師。

而擁有「謀勇兼備」（Daring Tact，デアリングタクト）既Normandy Owner Club都源自岡田牧場，董事岡田將一為岡田繁幸細佬既仔。岡田繁幸一生為當地賽馬貢獻良多，當地對佢突然離世無不震驚及婉惜，希望佢一路好走。

Source:日刊スポーツ