【LJS 2021】名古屋最終戰,濱尚美笑到最後成為冠軍

Ramos

18 February 2022, 11:53:31 am

經過去年十一月盛岡及高知兩個回合,高知所屬的濱尚美暫時取得95分,以26分優勢帶入嚟名古屋的最終兩戰,川崎所屬的神尾香澄66分跟隨其後,兵庫所屬的佐々木世麗雖然以61分排喺第三,但年初因健康問題而休戰,今個回合亦申請避戰,相信難以保持位置;另外,岩手所屬的関本玲花,日前因腳傷宣布缺陣,別府真衣 (現名:宮川真衣) 亦因轉任為練馬師而唔會參加最終回合;幸好,早兩個回合因傷休養,名古屋所屬的木之前葵,今日就喺主場復出跑呢個系列的最後兩場賽事。

LJS 2021最終章 - 名古屋站,兩場賽事分別於第九及十一場進行,兩場皆為1400米的泥地賽事,五位騎師宮下瞳 (名古屋)、木之前葵 (名古屋)、深澤杏花 (笠松)、神尾香澄 (川崎) 及濱尚美 (高知),爭奪最終王者誰屬。

第一戰,神尾香澄策騎 Nishino Stella (ニシノステラ),起步應聲彈出,沿途輕鬆一放到底贏馬,第二則由主場騎師宮下瞳策騎 Toho Angel (トーホウエンジェル),沿途居尾席,轉彎發力後來居上,季軍則為同場大熱門,深澤杏花策騎的 T M Queen (テイエムクイーン),濱尚美坐騎 Mr Sunrise (ミスターサンライズ)則跑第四,反觀木之前葵所策的 Toho Glorious (トーホウグロリアス),早段跟守好位,但末段後勁不繼,敬陪末席。

神尾香澄呢場先攞30分,收返窄同濱尚美的分數差距,宮下瞳亦因取得亞軍,進佔第三位,深澤杏花跑完第一戰後亦與宮下瞳分數相同,到咗最後一場開賽前,神尾香澄及宮下瞳兩位坐騎的賠率亦有所下調,但呢場話俾你聽咩嘢叫做「主場威力」。賽前為第三熱門,木之前葵的坐騎 Matera Shion (マテラシオン),起步反應最快率先搶出,最終亦由頭放到尾贏馬,同時為木之前葵喺今個系列取得首場勝利,原先以為會放頭的 Piramide (ピラミデ),起步嚟個外避失地,濱尚美都盡力擺返前走,不過轉彎時已經瞬即力弱,最終跑第五包尾,宮下瞳坐騎 Power Sky (パワースカイ) 乘 Piramide 冇力代之而起,門前力追得第二,深澤杏花坐騎 Takarajima (タカラジマ) 跑第三,至於神尾香澄坐騎,大熱門 Tsurumaru Oso (ツルマルオーソ) 就沿途冇段好睇,只係最後直路趕過 Piramide 跑梗頸四。

跑哂六場賽事,結合所有分數,高知所屬的濱尚美最終以117分勇奪LJS 2021 總合勝利,亞軍為川崎所屬的神尾香澄,獲得108分,宮下瞳則以總分86分得季軍。

其餘騎師總合分數如下:
深澤杏花 (笠松) - 83分
佐々木世麗 (兵庫) - 61分
関本玲花 (岩手) - 49分
木之前葵 (名古屋) - 40分
別府真衣 (高知) - 34分

Source: NAR
Photo: NAR