【Joaotheteacher又贏一場 西浦勝一臨退休前贏G3】

Tony

今個星期日本除咗二月錦標之外,仲有三場三級賽。

星期六先上演京都牝馬錦標,跑阪神內圈放頭跑始終有著數,「嬌花吐艷」(Iberis)嚟到呢場幾乎跑平磅嘅馬女限定賽,起步快閘放到頭後面就冇馬埋到佢身,就咁一放到底,加完獎金之後嚟緊可以揀縮程跑高松宮同去返一哩線跑維多利亞一哩;一對絲綢會名下馬「鍍金鏡」(Gilded Mirror)同「黑白配」(Blanc Noir)起步留到後一後,入到直路點捉到「嬌花吐艷」?
https://www.youtube.com/watch?v=4FSp0aooYT4

東京呢邊就有田村康仁馬房大豐收,先係新馬賽派3隻馬上陣包辦三重彩,再憑Grandiose由三浦皇成胯下,憑住個讓磅喺終點前趕過「威信英明」(Authority)贏出三級賽鑽石錦標。Grandiose係2018年菊花賞由莫雷拉策騎,當時日本媒體話佢係Sunday會出戰菊花賞嘅秘密武器,但係跑落影都冇之餘仲要傷埋,抖咗足足20個月先復出,之後贏過一場3勝條件賽,嚟到宜家6歲再贏返場三級賽,#joaotheteacher 又建一功呀!「威信英明」要挑戰春季天皇賞今場表現合格有餘,但係贏唔贏到睇嚟要問下「大哲學家」(Aristoteles)先。
https://www.youtube.com/watch?v=h0M_pfNBWSs

星期日就有小倉大賞典,大家以為蛯名正義憑「電工使者」(Denko Ange)喺高掛馬鞭之前完成中央全場重賞制霸,點知主角落咗喺即將退休嘅練馬師西浦勝一身上,石川裕紀人騎Territorial發力點搵得恰到好處,入直路一騎就趕過「民族服裝」(Dirndl),再力拒入彎走多咗腳程嘅Boccherini來犯取勝,相信呢場都可以為西浦臨退休前留下美好回憶。
https://www.youtube.com/watch?v=j8FZQcCJ_1M

Photo: Netkeiba