【Gibeon攻下金鯱賞 櫻花賞5張入場劵公佈】

Tony

先講新騎師,松本大輝星期六喺中京嘅泥地1勝條件賽開齋;兩位女騎師古川奈穗同永島真奈美亦都交出頭馬,其中古川喺星期六阪神1勝條件賽憑Bathrat Leon交出頭馬,呢隻新山紀念季軍降班上陣又有質素又有減磅之助最終大勝一場,賽後矢作芳人話同「鐵鳥翱天」贏G1一樣咁緊張!永島喺星期日中京嘅未勝利泥地賽憑師傅高橋康之訓練、前田家美國出品嘅Accueillir一放到底取勝。至於練馬師就有鈴木慎太郎同田中克典先後開齋。
https://www.youtube.com/watch?v=fqyB3dycmvU
https://www.youtube.com/watch?v=t5eHK1TaEXk

交代完新人戰績就要講咗最重要嘅金鯱賞先,個個都以為「謀勇兼備」(Daring Tact)復出戰可以輕勝,點知數漏18年NHK一哩盃亞軍Gibeon,呢隻馬自同年贏完中日新聞盃之後就一直無表現,近況平平仲要換上西村淳也,臨場冷落到227倍冷門;西村搶到頭段之後就慢放,入直路再放一段最終一放到底,「謀勇兼備」1檔起步冇耐就拉出去二疊,沿途守住第6位諗住追一段,結果入到直路要上完條斜路先撻著,鞭長莫及就係輸果一步,1.4倍大熱W就咁付諸東流。Gibeon就取得大阪盃優先出賽資格,西村亦首次贏出二級賽。賽後訪問杉山晴紀,佢話場地影響完全唔利追先係「謀勇兼備」敗因所在,上次掛住塊黏地牌贏櫻花賞都係對住馬女,今次一對住雄馬段段慢就追唔切;題外話,Gibeon殺低「謀勇兼備」仲殺低埋Win5買「謀勇兼備」叫糊嘅朋友,一下子冇咗9成飛,最後仲要一注獨中派5億5千萬刷新派彩紀錄,Fatfat!
https://www.youtube.com/watch?v=OIJTqaRZTAc

今個星期櫻花賞兩場預賽派出5張入場劵,先睇下阪神嘅報知盃雌馬預賽,熊本產馬Yoka Yoka入到直路首先突圍以為呢場二級賽手到拿來,冷不防「粉紅巨鑽」(Shigeru Pink Dia)之妹Shigeru Pink Ruby從後追上,終點前岩岩趕過Yoka Yoka,連同第3名嘅Minnie Isle一同取待櫻花賞優先出賽資格。今次亦係Shigeru系首度贏出草地級際賽,只係呢匹Shigeru Pink Ruby贏來僅熟,而近年報知盃組再出櫻花賞表現平平,相信正賽都係陪跑居多。
https://www.youtube.com/watch?v=008K_K7ZDD4

至於中山嘅海葵錦標就有2張入場劵,沿途守住內欄食糊位嘅Ginestra入到直路首先突圍,點知就好似星期六隻「智醒財星」咁越跑越斜,比留得仲後過佢、轉彎已經要走嘅Another Lyric後上趕過,兩匹馬一齊出線跑櫻花賞。Another Lyric出道至今都係由津村明秀打理,今場咁好表現正賽應該可以原裝上陣,希望唔好搞到好似「機伶金花」咁帥權不保啦。
https://www.youtube.com/watch?v=0wUpVXsGTrI

武豊今日52歲生日,呢個禮拜都贏咗2場,其中星期六早場三級賽中山牝馬錦標,上年落雪跑今年落雨跑,結果成為「輕磅放頭」同「重磅走大圈」邊個頂到最後嘅對決,Rambling Alley轉彎入直路已經講定一句啤酒園見,入到最後二百米仲落後前面輕磅放頭嘅Rose Amour四個馬位,結果岩岩好喺終點前壓贏對手,至於上屆冠軍「波爾卡舞」(Fairy Polka)前面追住Rose Amour追極都追唔到,後面仲有「好安寧」(Ho O Peaceful)喺大外檔起勢追,呢個第3就驚險得多。
https://www.youtube.com/watch?v=__UoY9a8Bq8

Photo: Netkeiba