【Cafe Pharoah大勝】

Tony

今個星期,日本夏季系列賽正式展開!

今個星期日本有兩場三級賽同一場表列賽,其中三級賽函館短途錦標同表列賽米子錦標係夏季系列計分賽,仲有一場三級賽就係麒麟錦標,呢場做咗肯塔基打吡計分賽。

函館短途錦標就有高松宮紀念賽季軍「全音階」(Diatonic)事隔三個月復出,武豊只需要出到閘再擺前面守住第二位,入直路過咗放頭嘅「大名富士」(Daimei Fuji)就搞掂,姿態好輕鬆,嚟緊短途馬錦標可以抄定呢隻爭標分子。至於去完杜拜嘅「好合時」(Right On Cue)就發揮一般得第6,當然今場熱身居多,之後短途馬錦標九成機會見到佢。

米子錦標今年成為夏季一哩系列一部份,今場頭馬可以賺得8分。上個月跑完橡樹大賽嘅Smile Kana,身為3歲雌馬磅位讓上讓,只揹50公斤出賽,咁樣受讓堆雄馬最少6公斤仲唔發達?跑完頭600放到頭,段段快放段段有,入到直路跟前啲馬埋身嘅機會都冇!係得留後嘅馬追上嚟,不過都係阻止唔到佢取勝。唔好講話擺柴田大知上去,擺周俊樂上去都一樣贏呀!之後可以留意佢會繼續部署一哩,定係之後會跑秋華賞。

麒麟錦標就係Cafe Pharoah同Lecce Baroque兩強對決,結果以前者大勝告終。大家可以睇下連達文點騎,16檔起步就由得隻馬拍住Lecce Baroque,入直路推兩下隻馬就自動波過咗對手,贏到甩晒。可以講定下個月泥地打吡佢應該都係擺下擂台,話book定去美國機票唔過份。沙特打吡盟主Full Flat復出跑第6,佢跑美國泥就夠前速放到返嚟,不過跑日本泥就明顯唔夠人快,而且Cafe Pharoah實在太強,邊有機會贏呀。

Photo: Netkeiba
重溫:
https://www.youtube.com/watch?v=hz5tS5DB4i8
https://www.youtube.com/watch?v=HeuFlIMTCmA
https://www.youtube.com/watch?v=mVieIyXWVPM