Tony

14 December 2020 at 3:52:47 pm

講完大賽，就睇返日本兩場三級賽。

星期六先舉行中日新聞盃，大家可以留意下川田將雅入到直路點樣騎「好快手」(Velox)？一路死頂同主嘅Boccherini唔比佢出嚟，擺明想攬炒咁話，不過頂多幾下自己都冇晒力企咗喺度；反而見松山弘平拉入內檔空位，一衝就過咗「粉紅巨鑽」(Shigeru Pink Dia)，初跑2000米一樣贏到，「好快手」就保住一席第3。呢匹Boccherini係「朗日清天」全弟，同阿哥一樣去到接近5歲先開始大熟大勇，出年中距離戰線又可以bookmark多一隻。
https://www.youtube.com/watch?v=f9CM14HDnCg

星期日跑香港短途錦標之前，中山就有亮星錦標，見到短途賽有安田隆行練嘅馬，不過唔係「野田重擊」，而係Red le Zele。佢跑泥地6-7化郎表現幾穩定，最近5場只係甩過一次前2，再加上繼續用川田將雅出戰，個個都當佢「野田重擊」咁睇，點知今場出閘唔夠人快跟住留後爆一段，僅僅過到地方贏返上中央連贏6場嘅Dancing Prince得亞軍；反而「俊男孩」(Justin)由上年轉播賽跑第2之後，踏入今年就贏咗3場，包括兩場大井嘅短途交流賽東京短途錦標同東京盃，上場JBC短途輸完之後終於返嚟中央上陣，比起兩大熱門揹多2公斤上陣都一樣贏出呢場三級賽。今年JRA同沙特合作，贏出呢場就有沙特泥地短途錦標出賽資格，唔知「俊男孩」會唔會喺沙特見呢？

Photo: Netkeiba