Tony

24 November 2020 at 12:36:52 pm

下年應該可以睇到Admire Virgo贏G1啦掛？

今個星期日本跑三日馬，星期六就上演表列賽仙女座錦標，Admire Virgo沿途留到中間位置走生位，不過轉彎飛咗出去差啲追唔切前面對手，最後100米睇住上年跑過三冠嘅Courageux Guerrier嚟過，造出3連勝。賽後友道康夫就話下場未決定跑邊場，不過佢打算循序漸進，現階段唔急住跑一級賽。Tony就喺度講定：出年大家準備睇佢贏一級賽！
https://www.youtube.com/watch?v=Tcr5vmBK5rY

跟住就講2歲賽事，星期日有2歲1勝條件賽赤松賞，「大震撼」與「夏威夷鳥」呢個配種組合終於出到一匹馬女Akaitorino Musume，今場換橫山武史上陣，雖然出閘就留到尾二位置，不過一入直路就走馬群位置，跟住前面就有大大個空位開出嚟，一打開條路隻馬就自動波湧上去就已經奠定勝局。呢場橫山武史啲走位意識可以話應記一功，唔係一般日本騎師果啲走中檔都要死等外檔嘅跑法，今次見位就上跑法就真係少見；至於隻馬就走返阿媽「夏威夷鳥」舊路，都係贏呢場條件賽上位，下場會唔會挑戰阪神2歲雌馬大賽呢？
https://www.youtube.com/watch?v=scaJkDrF87Y

星期一就有東京體育盃2歲錦標，安田隆行可以話公認最識練短途馬嘅日本練馬師，不過今年喺呢個短途王國入面就出咗呢隻Danon the Kid，6月寶塚紀念日新馬賽出道贏完就抖到宜家先跑，部署上叫有的放矢；今場全程一直睇住Titleholder嚟跑，入直路三兩步就拍住佢嚟過，輕勝而回。自2008年起贏出呢場東京體育盃2歲錦標嘅馬大部份都晉身一級賽冠軍，近十屆出過三匹打吡盟主（包括應屆三冠馬「鐵鳥翱天」(Contrail)），一匹皐月賞盟主，年長馬一級賽盟主亦有兩匹，呢匹野田系嘅馬出年三冠都值得大家留意。
https://www.youtube.com/watch?v=2I6etbyrJ3k

Photo: 日刊スポーツ