【8歲先返生】豐收節贏京都大賞典 Sunday Racing連贏東京雙重賞

Tony

13 October 2021, 3:14:04 pm

日本今個星期轉場去阪神、東京同新潟舉行賽事。

星期六早場東京有2歲三級賽沙特阿拉伯盃,知舍POG終於出現第一匹級際賽頭馬,Command Line呢匹由出道就已經受注目嘅一口馬,今場繼續跑1600全程都冇受太大考驗,轉彎見前面放得慢踩咗一段上第2位,入直路輕鬆趕過放頭馬,後面Sternatia騎足一條直路都過唔到,2戰2勝同「緊張大師」贏馬姿態一樣咁輕鬆,出年爭三冠高唱入雲,熱烈恭賀Edward Chan同Pat Tsang兩位勁賺3300分,Pat Tsang一個唔該就上咗第1位。
https://www.youtube.com/watch?v=TXITb8zGUlI

星期日阪神就有二級賽京都大賞典,「豐收節」(Makahiki)呢匹16年打吡冠軍年屆8歲仍然服役,正當大家真係以為盛年以過,今場就做場好戲比大家睇,沿途留後入到直路仲塞緊車重重圍困,前面「大哲學家」(Aristotle)同「神業」一對鬥緊嘅時候,藤岡康太一見到門打開就即刻衝上嚟,用足十成功力,終點嗰步岩岩好過到「大哲學家」,繼尼爾錦標之後事隔61個月再贏馬。幕後決定下場出戰日本盃,Tony評價就簡單直接:唔係仲有第二擊下話?呢場已經要學超仔話齋要掟落海,下場日本盃唔好話贏到,入到三甲真係可以掟多次落海喎!
https://www.youtube.com/watch?v=OQBxkbNQACQ

東京就上演每日王冠,今年JRA在悼念作曲家椙山浩一(為東京及中山競馬入場及開跑音樂作曲,賽馬以外就以《勇者鬥惡龍》系列出名)而決定用G1音樂入閘;「速度大師」(Schnell Meister)跑完安田紀念復出,今場仲有讓磅已經係一大優勢,起步留到包尾都唔怕,入到直路頭仲等緊位,最後200米仲落後「野田賢君」(Danon Kingly)3個馬位,李慕華一騎落去好好反應,壓線嗰一下岩岩過咗「野田賢君」。雖然今場贏完可以出戰秋季天皇賞,但係「速度大師」唔打算跑,反而會以一哩冠軍賽做目標,今場表現可以話打下強心針。
https://www.youtube.com/watch?v=EwFCmiGSm5I