【3歲預賽爭入場劵時間】2歲馬王2歲馬后輸晒

Tony

9 March 2022, 8:59:23 am

今個星期日本舉行三場級際賽。

星期六上演兩場級際賽,首先係阪神嘅二級賽鬱金香賞,15隻馬上陣爭3個櫻花賞優先出賽位,Namur上年跑阪神2歲雌馬大賽用杜滿樂早段留到包尾,直路追返唔少都係跑第4,今場橫山武史就冇犯錯,擺返去中間位置跑就發揮返本身實力,入到直路塞完望空就如狼似虎撲上嚟,最後100米控制大局勝出;上年2歲馬后Circle of Life拎呢場復出做熱身,杜滿萊一改上次留後衝跑法變咗擺前走,但係直路衝落去反應麻麻追住隻Sound Vivace都幾吃力,冷門Pin High都抄內檔過佢,結果跑入一席第3,3匹馬一齊拎走櫻花賞優先出賽位。
https://www.youtube.com/watch?v=Fo4teHgR6ek

中山就舉行三級賽海洋錦標,前田家出一對結果開到條位置Q出嚟,「不凡」(Bien Fait)今場14檔埋到欄放頭,頭600放個正常步速33秒4幾乎頂到尾,只係轉彎已經有隻同系馬「險峰懸壁」(Gendarme)睇住嚟食,呢匹2歲時贏過每日盃2歲錦標同希望錦標亞軍嘅良血馬轉戰短途賽之後都係止於贏表列賽,今場荻野極揀發力時機恰到好處,轉彎已經拍埋去「不凡」度,最後100米上晒斜先落力推騎趕過埋,除咗拎走高松宮紀念優先出賽位之外亦都幫呢位出道7年嘅騎師首勝重賞。
https://www.youtube.com/watch?v=UPa5bmWnLVI

星期日中山就有二級賽彌生賞,2歲馬王Do Deuce復出增程400米梗係試吓隻馬長力,不過武豊發揮有啲進退失據,沿路守第4位左右好地地,轉彎前面開始踩油,你自己就扣返落去後面,爭成幾個馬位入直路,蛇都死啦!結果就比佢一路死跟住嘅Ask Victor More頂到完場,Do Deuce追唔切得第2,同第3嘅Born This Way一齊出線皐月賞。Ask Victor More之前都係Do Deuce嘅蹄下敗將,上年10月出戰表列賽捧成大熱但不敵對方只跑第3,如今靠呢場二級賽證明返自己能力,但係正賽要面對幾大強手,似乎都係邊線份子。
https://www.youtube.com/watch?v=voL8eHU_4CQ

今個星期有9位新騎師出道,其中以角田大河成績最好,星期六喺阪神一上陣即贏2場頭馬,包括頭場泥地1800米馬女未勝利賽,騎Meisho Sogetsu排10檔起步快閘,沿途守住第2位,入直路見有對手埋身都只係打一鞭比隻馬唔好鬆懈,一路到終點都係齋推騎,初次上陣即贏馬;今屆唯一畢業女將今村聖奈,出道前搵到個經理人幫手接坐騎,上陣10次有1季2殿都算唔錯。
https://www.youtube.com/watch?v=lCIMHm4lJM4

知舍POG今個星期唯一一隻出賽馬就贏馬幫3個參賽者加分,價值一口7萬日圓/500口、絲綢會一口馬Epiphany轉歲初出出戰星期六中山未勝利1800米賽事,8檔出閘之後就守住第4位,入直路睇住隻Il Mondo嚟過,幫Homan、P9同KC Wong入咗520分。
https://www.youtube.com/watch?v=xDAIWlqpyOI