【2027交吉】新加坡賽事來年10月頭結束 馬來西亞有意施以援手

Homan

7 June 2023 at 7:19:59 am

新加坡馬會前日公布旗下馬場克蘭芝馬場將於下年10月5號後就唔再舉辦賽事，並需要於2027年初交還比政府發展。

新加坡政府決定回收克蘭芝馬場，重新發展成為住宅及休憩用地。除左改變土地用途外，當地政府認為世界各地馬迷人數下跌，亦導致佢地決定停運新加坡賽馬。新加坡財政部和國家發展部副部長Indranee Rajah就話馬迷人數逐漸減少，這不止於新加坡，英國及美國等國家都面對相似情況。政府明白練馬師、騎師及業界人士嘅反應及感受，佢地亦將會與業界人士接觸，聆聽佢地嘅擔憂。同時佢地預備唔同方面嘅支援，協助業界人士。

縱然在官方宣布前兩星期已有流言，但當地馬圈人士對有關公布感到震驚，畢竟佢地當初並不相信有關言論。新加坡練馬師協會主席練馬師克萊門（Michael Clements）形容有關決定為災難。佢話政府作出有關決定前並未曾與業界人士展開過對話，透露一啲馬販未有注意到政府計劃停運賽馬而購入幼駒準備到新加坡出賽。克萊門話佢明白政府嘅決定，但認為呢一切黎得太突然，令佢地完全失去預算，認為需要更長時間去預備。

現年42歲嘅練馬師林煒恩（Jason Lim）就話未曾想過有180年歷史嘅新加坡馬會會關閉，佢話現時佢地只知道最後一個賽日嘅日子，相關安排一概唔清楚。佢話自己嘅Jason Lim Racing Stable會為馬主購入幼駒並進行訓練及出賽。馬主會每月支付3,000美元作為訓練費用。當新加坡馬會公布關閉嘅消息後，有馬主已經向林煒恩表示唔會再支付月費，並允許賽駒任由佢處置。林煒恩就指出賽駒並非車輛，佢地喺動物，並非可以一時三刻就能處理佢地。現時新加坡約有700匹賽駒。

除左賽駒外，現時有擁有350員工嘅新加坡馬會，佢地嘅工作亦會受到馬場關閉影響。新加坡馬會就話會為佢地提供轉行培訓及協助佢地搵新工作。克萊門就預計會有700位業界人士會受影響。

喺新加坡馬會傳出關閉嘅消息後不久，新加坡近鄰馬來西亞嘅雪蘭莪馬會就表示佢地可以接收近300匹來自新加坡賽駒，同時佢地亦收到來自新加坡嘅練馬師查詢，表示有意喺當地繼續練馬生涯。

政府與業界人士將會接觸，究竟會唔會有足夠時間比業界人士順利過渡呢？新加坡政府一向以強勢見稱，究竟最終當地賽馬能否生存多一陣，就要睇之後嘅會面結果，但相信並不容易。

Source: channelnewsasia, anzbloodstocknews
Photo: Singapore Turf Club
==============================
Telegram公海：https://t.me/GoldRacing
YoutubeChannel：https://www.youtube.com/c/GoldracingHK競馬知舍
Instagram：https://www.instagram.com/gold.racing/
Patreon：https://www.patreon.com/hkgoldracing
FacebookPage：https://www.facebook.com/HKGoldRacing
Twitch：https://www.twitch.tv/goldenrace
賽馬新聞：https://www.hkgoldracing.com/news-1